Azərbaycan ilk dəfə TALIS qiymətləndirmə tədqiqatında iştirak edəcək

Təlim və Tədris üzrə Beynəlxalq Araşdırma (TALIS) ilk dəfə 2008-ci ildə keçirilib, periodik olaraq sonrakı tədqiqatlar 2013-cü və 2018-ci illərdə təşkil edilib. 2024-cü ildə keçiriləcək beynəlxalq tədqiqatda isə Azərbaycan ilk dəfə iştirak edəcək.

Bu barədə Təhsil İnstitutundan məlumat verilib. Qeyd edilib ki, TALIS iştirakçı ölkələrin və iqtisadiyyatların, İqtisadi İnkişaf və Əməkdaşlıq Təşkilatının (OECD), TALIS beynəlxalq konsorsiumun, Beynəlxalq və Avropa Təhsil Komissiyasının birgə əməkdaşlığı çərçivəsində yaradılıb. Beynəlxalq qiymətləndirmə tədqiqatı OECD və Təhsil Nailiyyətlərinin Qiymətləndirilməsi üzrə Beynəlxalq Assosiasiya tərəfindən idarə olunur, bütün prosedurlar bu iki qurum tərəfindən müəyyənləşdirilir və həyata keçirilir.

Tədris prosesini peşəkar səviyyədə müzakirə etmək məqsədilə TALIS müəllimlərin və direktorların təcrübələri, tədrisə dair baxışları, peşəkar inkişafı, həmçinin onların işinin qiymətləndirilməsi, müxtəlif idarəetmə və iş yeri ilə əlaqəli problemlər kimi məsələləri araşdırır. TALIS tədqiqatının əsas üstünlüklərindən biri əldə edilən məlumatlar əsasında müxtəlif ölkələr arasında təhsil siyasətləri üzrə müqayisələr apara bilməkdir.

Tədqiqatda iştirak edən ölkələrin sayı hər bir tədqiqat dövrü üçün artmaqdadır: 2008-ci ildə 24 ölkə, 2013-cü ildə 38 ölkə, 2018-ci ildə isə 48 ölkə. Əsas hədəf qrup ümumi orta təhsil səviyyəsində çalışan müəllim və direktorlardır. Təhsil sistemlərinin ibtidai təhsil və ya tam orta təhsil üzrə sorğunu təşkil etmək imkanları var. Ancaq əksər ölkələr əsasən ümumi orta təhsil səviyyəsi üzrə sorğunu həyata keçirirlər. 2018-ci ildəki tədqiqatda ümumi orta və tam orta təhsil səviyyələri üzrə ümumilikdə 260 mindən çox müəllim, 15 min direktor iştirak edib.

Azərbaycanda TALIS qiymətləndirmə tədqiqatı Təhsil İnstitutu tərəfindən həyata keçirilir.