"Zəfər” elm müsabiqəsinin qaliblərinin mükafatlandırılma mərasimi keçirilib
Aztehsil.com xəbər verir ki , Şəki-Zaqatala Regional Təhsil İdarəsi tərəfindən təşkil olunan “Zəfər” elm müsabiqəsinin qaliblərinin mükafatlandırılması mərasimi keçirilib.
Şəki şəhər Nizami Gəncəvi adına 7 nömrəli tam orta məktəbin akt zalında keçirilən mərasimdə Şəki-Zaqatala Regional Təhsil İdarəsinin müdiri Günay Mahmudova, Məktəbəqədər və Ümumi Təhsil üzrə Dövlət Agentliyinin əməkdaşı Altun Rəcəbli, idarənin struktur bölmə rəhbərləri, Azərbaycan Təhsil İşçiləri Azad Həmkarlar İttifaqı Şəki rayon Komitəsimin sədri Ziyafət Xasiyeva, şəhid ailə üzvləri, təhsil işçiləri və şagirdlər iştirak ediblər.
Mərasim Azərbaycanın Dövlət Himninin səsləndirilməsi və Vətənimizin bütövlüyü uğrunda şəhid olan qəhrəmanlarımızın əziz xatirəsinin bir dəqiqəlik sükutla yad edilməsi ilə başlayıb.
Şəki-Zaqatala Regional Təhsil İdarəsinin müdiri Günay Mahmudova çıxışında müsabiqə qaliblərini təbrik edərək, tədbirin əhəmiyyətindən bəhs edib. İdarə müdiri son illərdə ölkəmizdə istedadlı şagirdlərin aşkara çıxarılmasına xüsusi diqqət yetirildiyini və onların bilik və bacarıqlarının inkişafı istiqamətində genişmiqyaslı işlərin həyata keçirildiyini vurğulayıb. G.Mahmudova istedadlı şagirdləri həvəsləndirmək, yaradıcılıq marağını artırmaq və şagirdlər arasında sağlam rəqabət mühiti formalaşdırmaq məqsədilə Şəki-Zaqatala Regional Təhsil İdarəsi tərəfindən il ərzində müxtəlif müsabiqələrin təşkil edildiyini qeyd edib.
İdarə müdiri çıxışının sonunda qaliblərə gələcək təhsil yollarında daha böyük uğurlar arzulayıb.
Daha sonra Məktəbəqədər və Ümumi Təhsil üzrə Dövlət Agentliyinin əməkdaşı Altun Rəcəbli qalibləri təbrik edərək, müsabiqənin yaradıcı və vətənpərvər gənclərin yetişdirilməsindəki mühüm rolunu qeyd edib.
Sonra şagirdlər onlara göstərilən diqqətə görə İdarə rəhbərliyinə təşəkkürlərini bildirib, bundan sonra da uğurlara imza atmaq üçün səylə çalışacaqlarını söyləyiblər.
Qaliblərə Şəki-Zaqatala Regional Təhsil İdarəsinin diplomları, "Bank Respublika", "Kapital Bank" və Azərbaycan Təhsil İşçiləri Azad Həmkarlar İttifaqı Şəki rayon Komitəsi tərəfindən müxtəlif hədiyyələr təqdim olunub.
Mərasim şagirdlərin ifasında şanlı zəfərimizdən bəhs edən ədəbi-bədii kompozisiyalarla davam edib.
Qeyd edək ki, müsabiqə Müzəffər Ordumuzun Vətən müharibəsində qazandığı tarixi Zəfərin əbədiləşdirilməsi və yaradıcı təfəkkürü ilə fərqlənən istedadlı şagirdlərin üzə çıxarılması məqsədilə təşkil edilib. Müsabiqədə aşağı və yuxarı yaş qruplarında ilk 44 yeri tutan və eyni nəticə göstərən 111 şagird qalib elan olunub.
\
ğ
