Onlayn müsabiqənin qaliblərinin mükafatlandırma mərasimi keçirilib-FOTO

"Su ehtiyatlarından səmərəli istifadə” mövzusunda vebinarın və "İqlim dəyişmələri və əhalinin sağlamlığı” onlayn sosial vloq müsabiqəsinin qaliblərinin mükafatlandırma mərasimi keçirilib.

Dekabrın 15-də Birləşmiş Millətlər Təşkilatının İnkişaf Proqramı (BMTİP), Ekologiya və Təbii Sərvətlər Nazirliyi, Təhsil Nazirliyi, Təhsil Nazirliyi Respublika Uşaq-

Gənclər İnkişaf Mərkəzi (RUGİM), "EkoSfera” SEM-in birgə təşkilatçılığı ilə "BMT-nin İqlim dəyişmələri üzrə Çərçivə konvensiyasına Azərbaycanın Dördüncü Milli Məlumatının hazırlanmasına texniki yardım” layihəsi çərçivəsində onlayn platformada "Su ehtiyatlarından səmərəli istifadə” mövzusunda vebinar, "İqlim dəyişmələri və əhalinin sağlamlığı” onlayn sosial vloq müsabiqəsi və "Mavi səma üçün təmiz hava” fotoşəkil müsabiqəsinin qaliblərinin mükafatlandırma mərasimi həyata keçirilib.

Tədbirdə BMTİP-nin Rezident nümayəndəsinin müavini Çaru Bist, Təhsil nazirininmüavini Firudin Qurbanov, Ekologiya və Təbii Sərvətlər nazirinin müavini Vüqar Kərimov,Birləşmiş Millətlər Təşkilatının İnkişaf Proqramının Proqram Məsələləri üzrə müşaviri Çingiz Məmmədov, Təhsil Nazirliyi Məktəbdənkənar fəaliyyətin təşkili şöbəsinin müdiri Elnur Əliyev, Təhsil Nazirliyi Respublika Uşaq-Gənclər İnkişaf Mərkəzinin direktoru FiruzəSultan-zadə, Ekologiya və Təbii Sərvətlər Nazirliyinin Ekoloji maarifləndirmə və ictimaiyyətlə əlaqələr şöbəsinin müdiri Səyyarə Məmmədova, IDEA İctimai Birliyinin icraçı direktoru Surxay Şükürov, WWF Azərbaycan ofisinin direktoru Elşad Əsgərov, KİV nümayəndələri, münsiflər heyəti və qeyd olunan müsabiqə qalibləri iştirak edib.

Tədbirin rəsmi hissəsini giriş sözü ilə Azərbaycan Respublikasının Təhsil nazirinin müavini cənab Firudin Qurbanov açıb. Ekologiya və Təbii Sərvətlər nazirinin müavini cənab Vüqar Kərimov və Birləşmiş Millətlər Təşkilatının İnkişaf Proqramının Rezident Nümayəndəsinin müavini xanım Çaru Bist salamlama nitqi ilə çıxış ediblər. Qeyd edək ki, cari ilin 25 aprel-30 sentyabr tarixlərində Təhsil Nazirliyi Respublika Uşaq-Gənclər İnkişaf Mərkəzinin təşkilatçılığı ilə keçirilən "İqlim dəyişmələri və əhalinin sağlamlığı” onlayn sosial vloq müsabiqəsi üzrə Bakı şəhəri və respublikanın regionlarından 3 yaş qrupu üzrə (8-11, 12-15, 16-19 yaş qrupları) Təhsil Nazirliyinin tabeliyində fəaliyyət göstərən ümumtəhsil müəssisələri və Uşaq-Gənclər İnkişaf Mərkəzlərinin ekoklub üzvlərindən ibarət 1705 iştirakçı müraciət edib, ümumilikdə 250 video vloq final mərhələyə vəsiqə qazanıb, 12 yer üzrə 29 qalib seçilib.

18 iyul-12 sentyabr tarixlərində keçirilən "Su ehtiyatlarından səmərəli istifadə” mövzusunda maarifləndirmə proqramı çərçivəsində 2000 məktəblinin iştirakı ilə 10

vebinar keçirilib. Sosial şəbəkələrdə yayımlanan vebinarlara 10 000-ə yaxın baxış olub. İştirakçıların videoçarxlar və esse müsabiqəsinə göndərilən işlər arasında I, II, III yerlər üzrə 20 qalib olub.

"Mavi səma üçün təmiz hava” fotoşəkil müsabiqəsi 7 sentyabr - Beynəlxalq «Mavi Səma üçün Təmiz Hava» gününə həsr olunub. Yaradıcı insanların köməyilə geniş auditoriyanın diqqətinin təmiz texnologiyalara və alternativ enerji mənbələrinə keçidə cəlb edilməsi məqsədilə peşəkar və həvəskar fotoqraflar cəlb olunub. Müsabiqəyə ümimilikdə iki nominasiya üzrə 72 fotoşəkil təqdim olunub və 6 qalib seçilib.Qaliblər diplom və qiymətli hədiyyələrlə, digər bütün iştirakçılar isə sertifikatlarla təltif olunub.

Covid-19 pandemiyasının ölkəmizdə yarada biləcəyi təhlükənin qarşısının alınması məqsədilə elan edilmiş karantin rejimi ilə əlaqədar qaliblərin mükafatlandırma

mərasimi onlayn formatda keçirilib.