Bizdə bu qiymətləndirmə mexanizmində çox böyük səhvlər var..EKSPERT RƏYİ

Azərbaycanın ümumi təhsil müəssisələrində şagirdlərin sinifdən-sinfə keçirilməsi üçün illik qiymətləndirilməsində dəyişiklər edilib.

Bu barədə GSR.fm-ə müsahibə verən təhsil eksperti Nadir İrafilov bildirib ki, dəyişiklik təhsildə olan nöqsanı, buraxılan səhvi düzəltməyə xidmət edir:

"Bizdə qiymətləndirmə tarixən sovet dövründə 5 ballıq sistemlə olub. Daha sonra kurikuluma keçidlə əlaqədar bu qiymətləndirmə qaydaları dəyişildi. Qiymətləndirmədə yeni müvafiq qiymətləndirmə mexanizmi yaradıldı. Bu rəqəmli qiymətləndirmə "sözlü” qiymətləndirmə ilə əvəz olundu. Əvvəllər "2”, "3”, "4”, "5” rəqəmləri ilə qiymətləndirilirdisə, indi "yaxşı mənimsəyib”, "kafi mənimsəyib” və sair kimi qiymətləndirilir. Bu qiymətləndirmədə kəskin fərq əmələ gətirir. Necə ola bilər ki, orta məktəb şagirdi 250-300 qızıl medal ala bilir, amma qəbul imtahanında 700 bal yığan şagirdlərin sayı 7-8 nəfər olur. Ümumiyyətlə sovet dövründə orta məktəblərdə qiymətləndirmə rüblük şəklində olurdu. Daha sonra lazımsız dəyişikliklər aparıldı. Yəni rüblüklər ləğv olundu, yarımilliklər yaradıldı. Bu əslində şagirdlərin məsuliyyətini xeyli azaltdı. Həmişə bu qiymətləndirmə mexanizmində son dövrün qiyməti əsas götürülür. Əgər şagird birinci yarımillikdə 5 alıb, ikinci yarımillikdə 4 alırdısa, son qiymətləndirmə 5 olurdu. Lakin son qiymətləndirmədə bu prinsip pozulmuşdu. Bu mənada dəyişiklik o nöqsanı, buraxılan səhvi düzəltməyə xidmət edir. Yəni əgər şagird birinci yarımildə 4, ikinci yarımildə 5 alıbsa, deməli şagirdin biliyi artışa doğru gedib və sonuncu qiymət əsas götürülməlidir. Əksi olarsa, sonuncu qiymətləndirmə 4 olmalıdır. Bizdə bu qiymətləndirmə mexaniz-mində çox böyük səhvlər var. Bu məsələ dəfələrlə müxtəlif forumlarda, ayrı-ayrı iclaslarda, mətbuatda deyilib. Mənim fikrimcə, ölkəmizdə vahid qiymətləndirmə sistemi tətbiq olunmalıdır”.

gsr.fm