Xəbərlər
15 iyun 2016
15 345
Diaqnostik Qiymətləndirmə ilə bağlı xəbər var
"Müəllimlərin diaqnostik qiymətləndirilməsi ölkənin digər şəhər və rayonlarında da aparılacaq”.
Bunu təhsil naziri Mikayıl Cabbarov "Gülüstan” sarayında Heydər Əliyevin anadan olmasının 93-cü ildönümü münasibətilə təşkil olunmuş "Ən yaxşı təqdimat” müsabiqəsi qaliblərinin mükafatlandırılması mərasimindəki çıxışında deyib.
M.Cabbarov qeyd edib ki, bundan sonra strategiyaya uyğun olaraq əmək haqqı islahatının ikinci mərhələsinə - differensal, yəni peşəkarlıq səviyyədən və əməyin nəticələrindən asılı olan əmək haqqı sisteminə keçmək planlaşdırılır.
Müəllim əməyinin stimullaşdırılması ilə bağlı son 2 ildə atılan addımlara toxunan Təhsil Naziri diaqnostik qiymətləndirməni bu peşənin nüfuzunun yüksəldilməsində dönüş nöqtəsi olduğunu vurğulayıb: "2014-cü ildə Bakı şəhərində 30 min, 2015-ci ildə isə ölkənin 3 şəhər və 9 rayonunda 26 min müəllimin bilik və bacarıqlarının diaqnostik qiymətləndirilməsi aparılıb. Bununla ölkə üzrə müəllimlərin 40%-nin dərs yükü 1,5 dəfə, vəzifə maaşı isə 2 dəfə artıb. Nəticədə müəllimlərin ortaq aylıq əmək haqqısı ölkə üzrə müvafiq göstəriciyə yaxınlaşıb”.
Müəllim-şagird nisbətində əsaslı irəliləyişlərə nail olunduğunu bildirən M.Cabbarov əlavə edib ki, bu göstərici 2012-2013-cü tədris ili müqayisədə 2015-2016-cı ildə 1:10-dan, 1:12 nisbətinə yüksəlib.
