Şimali Kipr televiziyası Azərbaycan haqqında 2 saatlıq veriliş yayımlayıb.

Şimali Kipr Türk Respublikanın aparıcı televiziya kanallarından olan Ada TV kanalında 28 May Respublika Bayramı münasibəti ilə 2 saatlıq veriliş yayımlanıb. Azerbaycan Kıbrıs Dostluq Cəmiyyətinin təşkilatçılığı ilə həyata keçirilən proqramda Azərbaycan tarixi və günümüzdə ölkənin iqtisadi-siyasi inkişafı əks olunub. Azərbaycan-Kıbrıs Dostluq Cəmiyyətinin sədri Orxan Həsənoğlu canlı yayında qonaq kimi çıxış edib. Proqramda həmçinin ölkəmizdə son illər görülən işlər və beynəlxalq sahədə əldə olunan uğurlardan bəhs edilib. "Dağlıq Qarabağ probleminin son günlər daha çox aktuallaşması diqqətləri bu problemin həllinə yönəldib. Azərbaycan Prezidenti İlham Əliyevin siyasi iradəsi və beynəlxalq aləmdəki nüfuzu problemin həllinə daha obyektiv yanaşılmasına səbəb olub" - Orxan Həsənoğlu belə deyib. O bildirib ki, ortaq milli dəyərlərə sahib iki qardaş ölkə arasında münasibətlərin daha da inkişaf etdirilməsi və rəsmi dövlət proqramlarının birlikdə həyata keçirilməsi üçün Qarabağın işğaldan azad olunması məsələsi mühüm əhəmiyyət kəsb edir. "Ölkəmizin müxtəlif beynəlxalq tədbirlərə uğurla ev sahibliyi etməsi ölkənin tanıtımı və turizmin inkişafına hesablanıb". O.Həsənoğlu bir diaspora teskilatı kimi qarşılarındakı əsas məqsədin Azərbaycan-Kıbrıs dostluq münasibətlərinin gücləndirilməsinə töhfə vermək olduğunu vurğulayıb. Efir zamanı izləyicilər Azərbaycanın tarixi, mədəniyəti, milli adət-ənənələri haqqında məlumatlandırılıb.