Məleykə Abbaszadə buraxılış imtahanlarının məzmunu ilə bağlı səsləndirilən fikirlərə münasibət bildirib
Dövlət İmtahan Mərkəzinin (DİM) Direktorlar Şurasının sədri Məleykə Abbaszadə son günlər ictimaiyyət arasında müzakirə olunan buraxılış imtahanlarının məzmunu və mürəkkəbliyi məsələsinə aydınlıq gətirib.
Buraxılış imtahanlarında istifadə olunan bütün test tapşırıqlarının ümumtəhsil müəssisələrində qüvvədə olan dərsliklər əsasında hazırlandığını və müvafiq fənlər üzrə təhsil proqramı -kurikulumun təlim nəticələrinə uyğun bilik və bacarıqları yoxlamağa xidmət etdiyini bildirib.
“İmtahanda istifadə olunan hər bir tapşırığın, hər bir sualın məqsədi var. Bütün bunlar bəlli standartlar üzrə bilik və bacarıqları yoxlamaq üçündür. Hər bir tapşırığın konkret olaraq hansı standartı yoxlamağa xidmət etdiyini də göstərə bilərik”, – sədr deyib.
M.Abbaszadə vurğulayıb ki, bəzən imtahanların çətinliyi ilə bağlı ictimaiyyət nümayəndələri ziddiyyətli fikirlər səsləndirir: “Test sisteminin əzbərçiliyə səbəb olduğunu söyləyirlər. Ancaq müəyyən bacarıqları yoxlayan yazılı cavab tələb edən açıq tipli tapşırıqlardan istifadə olunanda çətindir deyirlər”.
DİM sədri riyaziyyat fənninə dair suallarla bağlı səsləndirilən fikirlərə də münasibət bildirib: “Tapşırıqlar iştirakçıların yazılı cavablarının statistik təhlili əsasında bir daha araşdırılacaq və yekun qərarı ekspert komissiyası verəcək”.
