“Qələbə dərsləri”nin tədris ilə bağlı AÇIQLAMA

"44 günlük Vətən müharibəsində ermənilər tərəfindən 10 nəfər şagirdimizin, 20 nəfər müəllimimizin həyatına son qoyulub, 54 təhsil müəssisəmiz darmadağın edilib”.

Bunu Təhsil naziri Emin Əmrullayev "Milli Məclis” jurnalına verdiyi müsahibəsində qeyd edib.

Onun sözlərinə görə, insan itkiləri bərpa edilməsə də, məktəblər əvvəlkindən daha yaxşı şəkildə bərpa olunur:

"Qürurverici haldır ki, işğal altında olan torpaqlarımızın azad edilməsi üçün səfərbərliyə qoşulanların sırasında 20 məktəb direktoru, 32 direktor müavini, 671 müəllim şücaətlə mənfur düşmənə qarşı vuruşdu. Azərbaycan ordusunun şanlı qələbəsinin tədris məzmununa üzvi şəkildə inteqrasiyasını təmin etmək məqsədi ilə "Azərbaycan xalqının tarixi qələbəsinin tədrisdə əks etdirilməsi haqqında” Təhsil Nazirliyinin fəaliyyət planı təsdiq olunub.

Artıq dərslik müəlliflərimiz və nəşriyyatlar "Qələbə dərsləri” adı altında müxtəlif fənn və sinifləri əhatə edən mövzular hazırlayıb Təhsil İnstitutunun rəsmi səhifəsinə yerləşdiriblər. Müəllimlərimiz bu mövzuları virtual dərslərdə tədris edirlər, həmçinin teledərslərdə də qələbəyə həsr olunmuş süjetlər hazırlanıb”.

"Vətən müharibəsi, Ali Baş Komandan İlham Əliyevin rəhbərliyi və müzəffər ordumuzun şücaəti nəticəsində əldə olunan qələbə bizə çox şey öyrətdi. Deyə bilərəm ki, hər birimizə dərs verdi - həmrəy olmağın, məqsədə doğru addım-addım irəliləməyin, ümidsizliyə qapılmamağın, düzgün strategiya qurmağın, bu strategiyanı sərrast taktiki addımlarla dəstəkləməyin, həm hərbi, həm siyasi, həm də iqtisadi müstəvidə uğurlu olmağın vacibliyini göstərdi.

Bu sadaladıqlarımızı addım-addım şagird və tələbələrimizə öyrətməliyik ki, bir daha heç bir mənfur qüvvə Azərbaycana qarşı qalxmağa cürət etməsin. Güclü dövləti qurmağın yolu həm də təhsildən keçir”, - deyə nazir qeyd edib.

Məqalə Göndər