Xəbərlər
24 iyun 2017
2 767
"Magistratura üzrə qəbul yerlərinin bəzi ixtisaslar üzrə boş qalması təbii haldır"-ekspert rəyi
"Elmin inkişafı magistratura pilləsindən asılıdır"
Nadir İsrafilov: "Elmə marağın artırılması istiqamətində müəyyən işlər görülməsə, gələcəkdə magistratura üzrə boş plan yerlərinin sayı çox olacaq"
Məlum olduğu kimi, 2017/2018-ci tədris ili üçün ali təhsil müəssisələrinin və AMEA-nın magistraturalarına qəbul 70 proqram üzrə aparılıb və proqramlar üzrə müsabiqə vəziyyəti müxtəlif olub. Dövlət İmtahan Mərkəzinin yaydığı məlumata əsasən, ayrılmış 7703 plan yerinə 6233 bakalavr (onlardan 2352 nəfəri dövlət sifarişi əsasında) qəbul olunub və plan yerləri 80.92 % dolub.
Ancaq onu da qeyd edək ki, proqramlar üzrə ayrılmış plan yerlərinin dolma göstəriciləri fərqlidir. Misal üçün, proseslərin avtomatlaşdırılması, geodeziya və xəritəçilik, kimya, fövqəladə hallar və həyat fəaliyyətinin təhlükəsizliyi mühəndisliyinə, coğrafiya, əczaçılıq və xüsusi təyinatlı hərbi ixtisaslara aid 13, 17, 18, 24, 25, 34, 55, 59, 61, 62, 63, 67 saylı proqramlara ayrılmış plan yerləri 100 % dolub.
Ən aşağı müsabiqə vəziyyətinin formalaşdığı dağ-mədən mühəndisliyi, filologiya və tərcümə, dinşünaslıq, balıqçılıq sahələrinə aid 29, 39, 41, 43, 51, 52, 69 saylı proqramlara ayrılmış plan yerlərinin 50 %-dən çoxu boş qalıb. Bu proqramlar üzrə plan yerlərinin tam dolmayacağı əvvəlcədən məlum idi. Belə ki, həmin proqramlar üzrə ixtisaslaşma seçiminə buraxılan bakalavrların sayı plan yerlərindən az idi.
Adıçəkilən ixtisaslar üzrə magistraturaya qəbul yerlərinin nə səbəbdən tam dolmamasının səbəbini öyrənmək məqsədilə təhsil ekspertlərinə müraciət etdik.
Təhsil eksperti Nadir İsrafilov açıqlamasında qeyd etdi ki, magistratura üzrə qəbul yerlərinin bəzi ixtisaslar üzrə boş qalması təbii haldır: "Çünki bu hal tək magistratura üzrə deyil, hətta ali məktəbə qəbul sahəsində də yaşanır. Problemin aradan qaldırılması istiqamətində aidiyyəti qurumlar tərəfindən müəyyən işlər görülməlidir".
Həmsöhbətimizin sözlərinə görə, elmin inkişafı magistratura pilləsindən asılıdır: "Bu gün elm sahəsində çalışanların əksəriyyəti, demək olar ki, yaşlı nəslin nümayəndələridir. 30-32 yaşında olan bir şəxs elmə maraq göstərmir. Əslində, bunun səbəbi bəllidir - sosial həyat. Bu səbəbdən də gənclərin elmə maraq göstərməsi üçün stimullaşdırıcı tədbirlər görmək lazımdır".
Ekspertin fikrincə, elmə marağın artırılması istiqamətində müəyyən işlər görülməsə, gələcəkdə magistratura üzrə boş plan yerlərinin sayı çox olacaq.
baki-xeber.com
