Bağça müdiri ilə məktəb direktoru vəzifədən azad edildi
Qazax-Tovuz Regional Təhsil İdarəsi tərəfindən bir sıra təhsil müəssisələrində yoxlama və monitorinqlər aparılıb.
Oxu.Az xəbər verir ki, yoxlama və monitorinqlər əsasən təhsil müəssisələrində təlim-tərbiyə prosesinin təşkili, tədris-pedaqoji və metodiki sənədlərlə işin təşkili vəziyyəti, əmək və təhsil qanunvericiliyinin tələblərinin, əmək və icra intizamının, sənədləşmə işlərinin, təchizatın və təsərrüfat fəaliyyətinin real vəziyyətinin öyrənilməsi və digər məsələlər ilə bağlı aparılıb.
Nəticədə təhsil müəssisələrində əmək qanunvericiliyinin tələblərinin pozulduğu, sənədləşmə işlərinin düzgün aparılmadığı, müəssisəyə rəhbərlik və nəzarətin zəif təşkil olunduğu, mövcud qanunvericiliyin tələblərinin kobud şəkildə pozulduğu, digər nöqsan və çatışmazlıqlara yol verildiyi aşkar edilib.
Müəssisəyə rəhbərlik və nəzarətdə ciddi nöqsanlara yol verdiklərinə, vəzifə səlahiyyətlərindən sui-istifadə etdiklərinə, əmək müqaviləsi üzrə öhdəlikləri və vəzifə funksiyalarını yerinə yetirmədiklərinə görə Ağstafa rayon Qırılı kənd 2 saylı körpələr evi-uşaq bağçasının müdiri və Ağstafa şəhər A.Abdullayev adına 2 nömrəli tam orta məktəbin direktoru Məktəbəqədər və Ümumi Təhsil üzrə Dövlət Agentliyinin müvafiq əmrlərinə əsasən tutduqları vəzifələrdən azad ediliblər.
