Universitet və kollec rəhbərlərinə imtahan sessiyası ilə bağlı tapşırıq verilib
Ali və orta ixtisas təhsili müəssisələrində 2022-2023-cü tədris ilinin payız semestrinin imtahan sessiyası davam edir.
Bu barədə Elm və Təhsil Nazirliyindən məlumat verilib.
Bildirilib ki, imtahan sessiyasının təşkili ilə əlaqədar ali və orta ixtisas təhsili müəssisələrinin rəhbərlərinə imtahanların qüvvədə olan normativ sənədlər əsasında təşkilini təmin etmək, rəhbərlik etdikləri müəssisələrdə imtahan qərargahı yaratmaq və qərargaha daxil olan hər bir şikayəti operativ şəkildə araşdırmaq tapşırılıb.
İmtahanların təşkili və gedişatında nöqsan, həmçinin neqativ hallara yol verən şəxslərlə bağlı mövcud qanunvericiliyə uyğun tədbirlər görüləcək.
Qeyd edək ki, 29 dekabr 2022-ci il tarixindən start verilən imtahanlar 5 həftə müddətində davam edəcək.
