Müəllim şagirdlərə sadəcə nəyi öyrənəcəklərini deyil, necə öyrənəcklərini də izah edir

Şagird yönümlü olma – Müəllim, hər bir şagirdi öyrədə biləcəyinə və hər bir şagirdin öyrənə biləcəyinə inanır; böyük bir şövqlə və məsuliyyətlə şagirdlərin təlim-tərbiyəsiylə maraqlanır; şagirdin öyrənməsini və inkişafını mütəmadiən izləyir; şagirdlərə sadəcə nəyi öyrənəcəklərini deyil, necə öyrənəcklərini də izah edir; şagirdlərin maraq, istək, ehtiyac və gözləntilərini nəzərə alaraq öyrənmə mühiti yaradır; öyrənmə prosesində hər bir şagirdin iştirakını təmin edir; siniflə bağlı qərar almada şagirdlərin iştirakını təmin etməklə onlarda məsuliyyət hissini formalaşdırır; şagirdlərə şəxsi nümunə olur; dərslərində müvəffəq  və davranışlarında intizamlı olan şagirdləri təqdir edir və mükafatlandırır.

Əməkdaşlıq etmə – Müəllim, şagird mərkəzli təlim üsulları, sinif idarəetməsi, sağlam ünsiyyətin qurulması çətin olan şagird və valideynlərlə bağlı bilik və bacarıqlarını, təcrübəsini və ya çətinliklərini məsləkdaşları ilə bölüşür; məktəb rəhbərliyinin, məsləkdaşlarının və valideynlərin dərsini dinləməsini məmnuniyyətlə qarşılayır; dərs işləmə tərzi və məsləki ehtiyacları ilə bağlı məktəb rəhbərliyinin və məşləkdaşlarının obyektiv fikirlərini dinləyir. Müəllim, övladının öyrənmədəki müvəffəqiyyətindən, valideynin savadlılıq səviyyəsindən və ya digər səbəblərdən asılı olmayaraq bütün valideynlərə obyektiv yanaşır; şagirdin təlim-tərbiyəsinə töhvə vermək üçün zamanında valideynlə əlaqə saxlayır; şagirdin öyrənmə səviyyəsi haqqında mütəmadi olaraq valideyni məlumatlandırır; övladının dərsində iştirak etmək üçün valideyni təşviq edir; şagirdlərlə bağlı qəarar vermə prosesinə valideynlərin qatılmasına şərait yaradır; iclaslarda və fərdi görüşmələrdə valideynlər və şagirdlərlə bağlı gözləntilərini ifadə edir; valideynlərin də məktəblə bağlı gözləntilərini öyrənməyə çalışır və bu gözləntiləri məktəb rəhbərliyi ilə də bölüşür; iclaslarda valideynləri məktəbin intizam qaydaları ilə tanış edir və bu qaydalara əməl edilməsinin zəruriliyini vurğulayır; valideyn və şagirdlərlə bağlı məsələlərin həllində valideyn komitəsinin sədrinin səmərəli fəaliyyət göstərməsi üçün onunla əməkdaşlıq edir. 

İnkişafa açıq olma – Müəllim, mütəmadiən özünü inkişaf etdirmə arzusuna sahibdir və yeni üsullar öyrənməyə və tətbiq etməyə cəhd edir; effektiv öyrənmə mühiti yaratmaq üçün bilik və bacarıqlarını dəyərləndirir; vəzifəsini yerinə yetirməsiylə bağlı rəhbərliyin, məsləkdaşlarının, şagirdlərin və valideynlərin fikrini alır; özünü dəyərləndirmə nəticəsində əldə etdiyi fikir ilə ətrafından əldə etdiyi fikirləri qarşılaşdıraraq məsləki ehtiyaclarını müəyyənləşdirir; məsləki ehtiyaclarını qarşılamaq üçün mütaliə edir, məsləkdaş dəstəyi alır və təlimlərə qatılır.