Ucqar kənd məktəbinə işə qəbul olunanda fikirləşdim ki, mənə çətin olacaq...GƏNC MÜƏLLİM

Qəzənfər Hüseynov Təhsil Nazriliyinin keçirdiyi müəllimlərin işə qəbulu üzrə müsabiqədə iştirak edərək Ağstafa rayon Həsənsu kənd tam orta məktəbinə qəbul olub. Qəzənfər 1990- cı ildə Gəncə şəhərində anadan olub. Orta təhsilini Gəncə şəhər 29 saylı məktəbdə başa vurduqdan sonra Bakı Dövlət Universitetin kimya fakültəsinə qəbul olub.

Müəllim olmağa nə vaxt qərar verdiniz?

-Mən universitetə hazırlaşarkən ağlıma belə gəlməzdi ki, mən müəllim olacam. Düşünürdüm gələcəkdə kimyaçı olacam. Zaman keçdikcə mən fikrimi dəyişdim və müəllim olmaq qərarına gəldim. Bu peşəni seçdiyimə görə çox xoşbəxtəm. Hər dəfə dərs dedikdən sonra necə düzgün qərar verdiyimi anlayıram.

Tədis etdiyiniz məktəbdə uşaqların və kollektivin sizə münasibəti necədir?

-Həsənsu tam orta məktəbində məktəb kollektivi çox mehribandır. Bilmədiklərimi təcrübəli müəllimlərdən öyrənirəm. Uşaqlarla münasibət düşünürəm ki, müəllimin özündən asılıdır. Hər bir uşağa şəxsiyyət kimi yanaşmaq lazımdır. Mən qısa zamanda uşaqlarla səmimi ünsiyyət qurmağı bacarmışam.

Həmkarlarınıza hansı mesajı vermək istərdiniz?

-Həmkarlarıma onu deyə bilərəm ki, arzularınıza çatmaq isdəyirsinizsə onların arxasınca gedin. Mən Gəncə şəhərində yaşayıram . Həsənsu kənd tam orta məktəbinə qəbul olduğumu biləndə fikirləşdim ki, mənə çətin olacaq. Uzaq məsafə, tanımadığım kollektiv, ilk pedaqoji fəaliyyət. Amma gəlib məktəb və kollektivlə tanış olduqdan sonra yanıldığımı hiss etdim. Əziz həmkarlar peşənizi sevin, sizin yolunuzu gözləyən şagirdlər var.

Nəcibə Vəliyeva . Ağstafa