MÜƏLLİM ÖMRÜ - “Əməkdar müəllim”, “Tərəqqi medalı”, “Qabaqcıl təhsil işçisi” Əliyev Fidayıl

"Əməkdar müəllim”, "Tərəqqi medalı”, "Qabaqcıl təhsil işçisi” Əliyev Fidayıl

Əliyev Fidayıl Əli oğlu, 5 dekabr 1957-ci ildə Göygöl rayonunun Səfərəliyev qəsəbəsində doğulub. 1965-ci ildə M.Ə.Sabir adına orta məktəbin(hazırki M.Ə.Sabir adına Samux şəhər 1 saylı məktəb-lisey) birinci sinfinə daxil olub, 1975 ildə həmin məktəbi xüsusi tərifnamə ilə bitirib. 1978-ci ildə H.Zərdabi adına Gəncə Dövlət Pedaqoji İnstitutunun (Gəncə Dövlət Universiteti) tarix fakültəsinə daxil olub, 1982-ci ildə həmin ali təhsil müəssisəsini fərqlənmə diplomu ilə bitirib.

Fidayıl müəllim 1982-ci ildə təyinatla Ağsu rayonunun Rəhimli kənd ümumi orta məktəbində həm fənn müəllimi, həm də sinifdən xaric təşkilatçı müavin kimi pedaqoji fəaliyyətə başlayıb. 1983-1988-ci illərdə Ağsu rayonu, Qaradağ kənd ümumi orta məktəbində direktor vəzifəsində çalışıb. 1988-1992-ci illərdə Göygöl rayonu, Almımmədli kənd ümumi orta məktəbində tarix-coğrafiya müəllimi və direktor müavini işləyib.

1992-ci ildə Samux rayonunun yaradılması ilə əlaqədar olaraq, yeni təşkil olunmuş Samux Rayon Təhsil Şöbəsinə metodist vəzifəsinə təyin olunub, eyni zamanda Samux şəhər S.Əliyev adına ümumi orta məktəbdə coğrafiya müəllimi kimi fəaliyyət göstərib. 2003-cü ildə M.Ə.Sabir adına Samux şəhər 1 saylı məktəb-liseyə direktor vəzifəsinə təyin olunub, lakin səhhəti ilə əlaqədar olaraq həmin ildə bu vəzifədən imtina edib. Hazirda Samux şəhər 1 saylı məktəb-liseydə coğrafiya müəllimi işləyir.

Pedaqopji fəaliyyəti dövründə çalışdığı pedaqoji kollektivin ictimai işlərində, rayon haqqında hazırlanmış sənədli filmlərdə iştirak edib. Uzun illər Tələbə Qəbulu üzrə Dövlət Komissiyasının Samux Rayon Sənəd Qəbulu Komissiyasında məsul katib vəzifəsində işəyib.

Fidayil müəllimin pedaqoji fəaliyyətinin əvəzində əməyinə həm ölkə Prezidenti Cənab İlham Əliyev, həm də Təhsil Nazirliyi tərəfindən yüksək qiymət verilib. Belə ki, 2007-ci ildə Azərbaycan Respublikası Təhsil Nazirliyinin 11/39 nömrəli əmrinə əsasən "Azərbaycan Respublikası qabaqcıl təhsil işçisi” döş nişanı, 2010-cu ildə Azərbaycan Respublikasının Prezidenti Cənab İlham Əliyevin 4 oktyabr 2010-cu il tarixli 1133 nömrəli Sərəncamı ilə "Tərəqqi” medalı ilə təltif edilib. Həmçinin 2014-cü ildə Azərbaycan Respublikası Prezidenti Cənab İlham Əliyevin 30 sentyabr 2014-cü il tarixli 756 nömrəli Sərəncamı ilə "Əməkdar Müəllim” fəxri adına layiq görülüb. Hazirda 34 illik pedaqoji malik olan Fidayıl müəllim bu sahədə fəaliyyətini davam etdirir.

Nurəddin Babayev. Samux