Ucqar kəndin gənc müəllimi “Uşaqlıqdan müəllimliyə həvəsim böyük idi”

 Samux rayon Kəsəmən kənd ümumi orta məktəbinin yerləşdiyi Kəsəmən kəndi rayon mərkəzindən 62 km uzaqlıqda, Azərbaycan Respublikası ilə Gürcüstan Respublikası sərhəddində yerləşir. Ucqar kənd məktəbi  olmasına baxmayaraq müəllimlərdə, xüsusən də başqa şəhər sakinlərindəki müəllim olmaq həvəsinin qarşısını bu amillərin ala bilməməsi çox sevindirici haldır.

 

Belə müəllimlərdən biri də müəllimlərin işə qəbulu üçün Təhsil Nazirliyi tərəfindən keçirilən imtahanlardan maksimum 60 bala qarşı 52 bal toplayaraq Kəsəmən kənd ümumi orta məktəbində Azərbaycan-dili və Ədəbiyyat müəllimi işləməyi seçən İbrahimova Xanımdır. Xanım müəllim 1994-cü il 18 dekabr tarixində Gəncə şəhərində doğulub. 2011-ci ildə Gəncə Dövlət Universitetinin filologiya fakültəsinə daxil olub, 2015-ci ildə isə müvəffəqiyyətlə təhsilini başa vurub. 

Bu gün Xanım müəllimin işlədiyi məktəbə gedərək həm dərs fəaliyyəti ilə tanış olduq və öz təəssüratlarını öyrəndik:

-Müəllim olmağı əvvəldən istəyirdiniz ?

-Bəli, uşaqlıqda müəllimliyə həvəsim böyük idi. Nəhayət coxdanki arzuma müsabiqədə topladığım yüksək balla nail oldum. Uşaqlarla işləmək, onlara bilmədikləri yenilikləri öyrətmək qürurvericidir.

 

-Bugün şəhərdə ali təhsil alanlar kənd həyatına getmək istəmir, Siz necə oldu ucqar bir kənddə işləməyi seçdiniz?

 

-Şəhərin səs-küyündən uzaq, sakit kənd şəraitində işləmək daha üstündür mənim üçün. Çünki, ucqar dağ kəndlərində müasir texnalogiya məhdud şəkildə inkişaf edib. Yenilikçi olmaq üçün bu kəndi seçdim və seçimimdən heç də narazı deyiləm.

 

-Yaşadığınız şəhərdən xeyli kənarda  yaşayırsınız, çətin deyil ?

 

-Əvvəl gələndə fikrimdə qətiyyətli deyildim, amma kəndin yerli camaatının səmimiliyi, gözəl mehriban iş kollektivinin olması, saf tərbiyəli , biliyə öyrənməyə həvəsli şagirdlərimin olması məni bu fikrimdən daşındırdı.

 

-Ailəniz və yaxınlarınızın bu kəndi seçməyinizə münasibəti necə oldu?

 

-İlk vaxtlar biraz narazı olsalar da, mənim bu yolda olan mübarizəmi görüb heç bir söz demədilər. Hər iki valideynim indi bu yolda bu yolda davam etməyim üçün mənə dəstəkdirlər.

 

-Şagirdlərlə ilk dərs gün necə oldu ?

 

-İlk dərs gün həm mən, həm də şagirdlər çox həyəcanlı idik. Müəllimlik andı içdim və o gündən özümdəki məsuliyyətin nə dərəcədə böyük olduğunu bildim.

 

-Sonda müəllim olmaq istəyənlərə tövsiyyəniz varmı?

 

-Əgər bu peşəni ürəkdən istəyirsinizsə, heç bir maneə sizin qarşınızı kəsə bilməz. Mən universiteti bitirdikdən 1 il sonra işə qəbul oldum. Bu müddət ərzində mübarizə apardım və nəhayət arzuma çatdım. Səbr və həvəsiniz ən əsası peşənizə sevginiz varsa Sizə bu yolda uğurlar.

 

Allah yar və yardımçınız olsun! 

Nurəddin Babayev .Samux.