Yüksək balla kənd məktəbini seçən gənc müəllim

Süleymaova Fəridə müəllimlərin işə qəbulu müsabiqəsində iştirak edib. 57 bal toplayan gənc müəllim rayonda işə qəbul olunan müəllimlər arasında ən yüksək nəticə göstərib.

Fəridə müəllim, hansı universiteti bitimisiniz?

-Mən Azərbaycan Padaqoji Universitetinin riyaziyyat müəllimliyi ixtisası üzrə təhsil almışam. Bakalavr təhsilimi bitirdikdən sonra magistr təhsilimi Bakı Dövlət Universitetinin mexanika- riyaziyyat fakültəsinin riyaziyyat müəllimliyi ixtisasında davam etdirmişəm.

Müəllim olmağa nə vaxt qərar vermisiz? Peşənizi sevirsiniz?

Orta məktəbdə oxuyarkən riyaziyyat fənninə qarşı məndə maraq yaranmışdı və bu fənni digər fənnlərdən daha çox sevirdim. İxtisas seçərkən riyaziyyat müəllimi olmağa qərar verdim. Mən peşəmi sevirəm. Uşaqların və kollektivin mənə qarşı sevgisini gördükcə mən peşəmə daha çox bağlanıram.

57 bal toplamısınız və bu olduqca yüksək nəticədir. Buna baxmayaraq kənd məktəbini seçmisiniz.

-Bəli, mənə bu sualı verənlər çoxdur. Mənim zənnimcə harada işləmək yox, işlədiyin yerdə nəyisə öyrətmək vacibdir. Mən Ağstafa rayonunda yaşayıram. Elə əvvəlcədən də burada işləmək istəyirdim və mən arzuma çatdım.

Şagirdlərin sizin dərsə marağı necədir?

-Təvazökarlıqdan uzaq olsa da, əminliklə deyə bilərəm ki, şagirdlərimin mənim dərsimə olan marağı müsbətdir. Düşünürəm ki, bu mənim həm gənc müəllim olmağım, həm səmimi olmağım, həm də şagirdlərlə dostluq etməyi bacarmağımla əlaqədardır.

Bölgələrdə işləmək istəyən gənc müəllimlərə nə demək istəyirsiniz?

-Gənc müəllimlərə demək istəyirəm ki, heç nədən qorxmasınlar. Sadəcə peşələrini sevsinlər və unutmasınlar ki, müəllimlik şərəfli peşədir. Bölgələrdəki şagirdlər paytaxdakı şagirdlərdən heç də geri qalmırlar. İstedadlı şagirdlərimizin də sayı çoxdur.

Nəcibə Vəliyeva . Ağstafa