Xəbərlər / Müəllim
17 oktyabr 2016
3 669
Elə bu kənddə müəllimlik fəaliyyətimi davam etdirməyi çox istərdim - Kənd məktəbini seçən Samirə Məmmədli
"Müəllim həm öyrənən, həm də öyrədəndir" Göygöl rayonunun yeni müəllimi
2016-2017-ci tədris ilində müəllimlərin işə qəbulu üzrə keçirilən müsabiqədə yüksək nəticə göstərən Samirə Məmmədli Göygöl rayon Zurnabad kənd tam orta məktəbində İngilis dili müəllim olaraq pedaqoji fəaliyyətə başlayıb. Samirə Məmmədli 2002-2006-cı illərdə Gəncə Dövlət Universitetinin İngilis dili müəllimliyi ixtisası üzrə bakalavr təhsili, 2006-2008-ci illərdə isə həmin universitetdə magistr təhsili alıb. 7 il müəllimlik təcrübəsi olan gənc kadr pedaqoji fəaliyyətini rayon mərkəzindən 12 km uzaqlıqda olan Zurnabad kənd tam orta məktəbində davam etdirir.
- İlk dəfə bu məktəbə gəldiyiniz zaman bir müəllim olaraq çətinlik çəkəcəyinizi düşündünüzmü?
-Mən təbiəti, kənd mühitini çox sevirəm. Hər halda şəhərdə yaşadığım üçün kənd həyatı məni cəlb edir. İlk dəfə kəndə gəlib təmirli, standartlara cavab verən məktəb binası gördüyüm zaman çox sevindim. Məni görüb xoş və isti münasibət göstərən kənd camaatı, məktəb rəhbərliyi, müəllim kollektivi mənə seçimimdə yanılmadığımı göstərdi. Düzdür yol uzaqdır, müəyyən problemlər olur ancaq insan sevdiyi peşəni etdikdən sonra onun üçün yol uzaqlığı və digər problemlər heç bir əhəmiyyət kəsb etmir.
- Şagirdlərlə ilk gün necə keçdi, onların sizə münasibəti necə idi?
- Şagirdlərlə ilk günüm çox yaxşı idi. Onlarla tanış olub, özümü təqdim etdim yeni ingilis dili müəllimləri olduğumu dedim. Əlbəttə ki, çox sevindilər. Təmirli məktəb yeni nəşr olunmuş kitablar, yeni müəllim onların lap ürəyincə oldu. Ümumiyyətlə kənd uşaqları çox saf, təmiz olur. Uşaqlardan aldığım müsbət enerji mənə çox yaxşı təsir edir. Hər gün gülərüz, sevinclə məni qarşılayan şagirdlər insana qürur hissi verir.
-Sizə stimul verən bu işə həvəsləndirən nədir?
- İlk öncə işimi sevməyim məni həvəsləndirən vasitədir. Digər bir tərəfdən isə Təhsil Nazirliyi müəllimlərin yaşayış şəraitin yaxşılaşdırılması, onların həvəsləndirilməsi üçün bir çox imtiyazlar müəyyənləşdirilib.Yəni sevdiyin işi yerinə yetirisən, cəmiyyətdə hörmət edilən bir peşəni, yəni müəllimliyi seçirsən və kifayət qədər də əmək haqqı əldə edirsən.
-Kənd məktəbində uzun müddət müəllim kimi çalışmaq fikriniz varmı?
-Əlbəttə ki, bunu zaman göstərər. Ancaq mənə yaradılan şərait bütün lazımı avadanlıqlarla təchiz olunmuş məktəb binası, hər gün məndə müəllimlik sevgisini artıran şagirdlərim, mənim üçün bunların hamısı çox xoşdur. Elə bu kənddə müəllimlik fəaliyyətimi davam etdirməyi çox istərdim. Kollektivde səmimilik, mehribanlıq çox önəmlidir və bizim kollektivdə sadaladıqlarım çox yüksək səviyyədədir.
-Müəllimlik fədakar olmaq, hər zaman yeniliyə can atmaq deməkdir. Bəs siz bir müəllim olaraq hansı yenilikləri etmək istəyirsiniz?
-İngilis dili elə bir fəndir ki, daim yenilənməyə şagirdlərə daha asan üsul və vasitələrlə çatdırılmağa ehtiyacı var. Əlbəttə ki, müəllim olaraq həmişə öz üzərimdə çalışıram. Müəllim həm öyrənən, həm də öyrədəndir. Dərsdən sonra şagirdlər üçün Conversation club təşkil etmək istəyirəm. Bu daha çox nitqin inkişafına, şagirdlərin ingilis-dilində düzgün danışmağa yönələcək. Ümid edirəm ki, bu yenilik şagirdlərin marağına səbəb olar.
Raminə Məmmədova .Göygöl.
