Mən nəyi isə uşaqlara öyrədəndə bundan zövq alıram- Gənc müəllim Araz Qurbanov.

Təhsil Nazirliyinin keçirdiyi müəllimlərin işə qəbulu müsabqəsindən uğurla keçərək pedaqoji fəaliyyətə başlayan yeni müəllimlərdən biri də Araz Qurbanovdur. Orta məktəbi bitirdikdən sonra AMİ- nin Qazax filialının Pedaqoji fakültəsinin Tarix- coğrafiya ixtisasına qəbul olub. Təhsil Nazirliyinin keçirdiyi Müəllimlərin işə qəbulu müsabiqəsində Araz 54 bal toplayaraq Düzqışlaq kənd tam orta məktəbinə işə qəbul olub.

Necə oldu qərara gəldiniz ki, müəllim olmalısınız?

-Düzünü desəm mən uşaqlıqda polis olmaq istəyirdim. Böyüdükcə müəllimliyə maraq yarandı. Axı bu cəmiyyətə həkimi də, polisi də, hərbiçini də yetişdirən müəllimdir. Bu ad çox böyük addır. Bilirsiniz , müəllim olmaq böyük məsuliyyətdir, hər zaman bu adı doğrultmağa, bu ada layiq olmağa çalışırsan. Sözün həqiqi mənasında "müəllim" ola bilməkçün hər zaman çalışmaq lazımdır.

Sizcə ideal şagird-müəllim münasibətini necə qurmaq olar?

-Məncə, bir müəllim çox sərt olmamalıdır, uşaqları gərgin şəraitdə saxlamaq lazım deyil. Kimisə qorxutmaqla, hansısa yaxşı nəticəyə gəlmək olmaz. İlk öncə uşağın psixoloji inkişafını, şəxsiyyətinin formalaşmasını nəzərə almaq lazımdır. Uşaq hər zaman müəllimin diqqətində olmasını hiss etməlidir. Əlbəttə, bütün bunlarla yanaşı müəyyən sərhədlər də saxlanmalıdır.

Hər dərs ili, eyni ünvan, eyni mövzular. Sizinçün yorucu olmaz ki?

-Uşaqlarla işləmək maraqlıdır. Bu zaman daha çox özümü kəşf edirəm. Mən nəyisə uşaqlara öyrədəndə bundan zövq alıram. Coğrafiya elə bir fəndir ki, nəinki şagirdlər, həmçinin insanlar üçün də maraqlıdır. Belə maraqlı bir fənni tədris etmək çox gözəldir. Mən işimdən yorulmuram, əksinə zövq alıram. Düşünürəm ki, bu hər zaman belə olacaq.

Həmkarlarınıza hansı mesajı vermək istərdiniz?

Həmkarlarıma demək istəyirəm ki, heç nədər qorxmasınlar. İşləmək üçün bir yerdən başlamaq lazımdır. Kənd, şəhər fərq etmir əsas odur isdək olsun. Hər şeydən şikayətçi olmaq lazım deyil, müəllim olduğumuzu, öyrətmək kimi böyük bir öhdəliyi üzərimizə götürdüyümüzü unutmayaq.

Nəcibə Vəliyeva .Ağstafa.