“Təhsilimiz: dünəndən sabaha” kitabının müzakirəsi keçirilib
Bakı Şəhəri üzrə Təhsil İdarəsinin (BŞTİ) tabeliyindəki 205 nömrəli tam orta məktəbdə “Təhsilimiz: dünəndən sabaha” kitabının müzakirəsinə həsr olunmuş “Dəyirmi masa” keçirilib.
“Dəyirmi masa”da BŞTİ-nin müdiri Mehriban Vəliyeva, Humanist Pedaqogika üzrə Təhsil Təşkilatları Beynəlxalq Assosiasiyasının prezidenti, kitabın müəllifi Asif Cahangirov, Təhsil İnstitutunun direktor müavini Ənvər Abbasov, Amerika Birləşmiş Ştatlarının Corc Vaşinqton Universitetinin proqram direktoru Sevinc Məmmədova, Təhsil Nazirliyinin sektor müdiri Cəsarət Valehov, İdarənin müvafiq struktur bölmə rəhbərləri, məktəb direktorları iştirak ediblər
Kitab haqqında fikirlərini bildirən məktəb direktorları ayrı-ayrı bölmələr üzrə təhlillər aparıb, kitabda məktəb idarəetməsi sahəsində diqqətə çatdırılan əsas istiqamətlərə dair diskusiya aparıblar.
Kitabın müəllifi Asif Cahangirov bildirib ki, “Təhsilimiz: dünəndən sabaha” kitabı bütün sosial kateqoriyalardan olan və təhsil problemlərinə maraq göstərən oxuculara ünvanlanıb. Yaşından, təhsil səviyyəsindən, peşəsindən və ixtisasından asılı olmayaraq, kitabdan hər bir şəxs, xüsusilə təhsil idarəediciləri və təhsil sahəsində çalışan mütəxəssislər, ali və orta məktəb müəllimləri və tələbələr əhəmiyyətli dərəcədə faydalana bilər.
