İlham Əhmədov : Məktəblinin dostu onun sinif rəhbəridir.

Bir həmkar soruşdu ki, "Məktəblinin dostu"  layihəsi barədə fikriniz nədir?

Dedim: Məktəblinin dostu onun sinif rəhbəridir, onun müəllimidir, məktəb  psixoloqudur. Baza təhsili,  heç bir pedaqoji və həyat təcrübəsi olmayan,  uşaq psixologiyasını bilməyən  uşaqların məktəbdə nə işi var?  Onların özünə indi dost lazımdır  ki,  düz yol göstərsin.  Desin ki, ay bala get özünə fərli sənət tap, iş tap, illərini məktəb koridorunda  gizlən-paç oynamaqla, müəllimlər haqqında faktlar toplamaqla  hədər yerə  keçirmə. Bu işin onlara nə perspektivi ola bilər?  Müəllimi  nüfuzdan salmağa yönəlmiş antipedaqoji  ideyadır. 

Guya müəllimlər təlim tərbiyə işini məktəbdə qura bilmədilər,  bu uşaqlar gəldi təhsili "ayağa qaldırdı".  Görün  bizim təhsil  siyasəti  nəyin üzərində qurulur: işaqlara təlim tərbiyə verən müəllimə dəstək verməkdənsə, müıllimin əl ayağına dolaşan yeni ştatlar  yaradılır, məktəbdə müəllimə inamsızlıq yaradılır.

 Tam mənasız  bir  təşəbbüsdür,  hiss edilir ki, təhsili elə bu uşaqlar səviyyəsində bilən menecerlərin növbəti əhəmiyyətsiz innovasiyasıdır. Bundansa  o pulları məktəbdə psixoloji xidmətin inkişafına yönəldərdilər, təhsildə real innovasiyalara yönəldərdilər.   MD kimi "layihə"lərin nə təhsilə, nə də onun keyfiyyətinə,  nə də məktəbliyə heç bir  xeyri yoxdur.

Bu gün təhsilin ən böyük problemi  səhv kadr  siyasətidir. Hətta pedaqoji təhsili və pedaqoji stajı olmayanların  məktəb direktoru təyin edilməsi barədə qərarların  qəbul ediləcəyi gözlənilir.  Yəni bundan sonra məktəbləri müəllimlər yox, menecerlər idarə edəcəklər. Menecerlər  Təhsili  idarə edib çox ağ günə çıxartdı, indi də məktəbləri  ağ günə çıxardacaqlar?  

Bəlkə də  TN-nin  baş planında gələcəkdə bu məktəblinin dostlarını məktəb direktorları təyin etmək nəzərdə tutulur ? 

Niyə son 30 ildə  Zahid Şöyübov kimi  məktəb direktoru  yaranmadı? Onun kimi direktora nə sosial işçi, nə nə MD lazım deyildi. Çünkü o hər bir məktəblinin, valideynin dostu idi. Allah Zahid  müəllimə və  bütün onun kimi şərəfli müəllimlərə, onlara dəyər verən M. Mehdizadə kimi nazirə rəhmət eləsin.