Məktəbdəki müəllimlərin 23,3 faizi niyə ali təhsilli olmadan dərs deyir?
Nadir İsrafilov: "Təhsil haqqında qanunun qəbulunun 15 ilə qədər ləngiməsi bu problemləri ortaya çıxardı”
2016-cı ildə Azərbaycanın orta məktəblərində 155448 müəllim çalışıb. 77,9 faizi qadın olan bu müəllimlərin 23,3 faizinin isə ali təhsili yoxdur. Onlar orta ixtisas təhsili ilə məktəblərdə müəllim kimi çalışırlar və əsasən də xarici dilləri tədris edirlər.
Aztəhsil.com xəbər verir ki, təhsil eksperti Nadir İsrafilovun "İslaminsesi” nə verdiyi açıqlamaya görə, Azərbaycan sovet imperiyasının tərkibindən çıxıb müstəqillik əldə etdikdən sonra, sosial-iqtisadi sferada olduğu kimi təhsil sahəsində də, müəyyən boşluqlar əmələ gəldi:
"Məsələn təhsil haqqında qanunun qəbulu 15 ilə qədər ləngidi. Təhsil sistemində maddi-texniki və hüquqi bazanın yaradılmasında problemlər yaşandı. Bu boşluq nəticəsində bir-birini təkrarlayan təhsil müəssisələri meydana gəldi və 70 –dən artıq təhsil müəssisəsinin 30-a qədəri müəllim hazırlığı ilə məşğul oldu. Sovet dövründə mövcud olan 3 ali məktəbin (Xarici Dillər, Pedaqoji və M.Ə Sabir adına pedaqoji texnikom) əvəzində 70-dən çox təhsil müəssisəsinin yaranması peşəkarlıq , maddi-texniki baza və kadr məsələlərini arxa plana keçirdi”.
Nadir İsrafilovun sözlərinə görə, Respublika Müəllimlərin Təkmilləşmə İnstitutu ( müəllimlərin ixtisasartırması və yenidən hazırlanması ilə məşğul olur) Müəllimlər İnstitutuna çevrildi və 11 filialı yaradıldı:
” Bu kimi boşluqlar sadaladığımız problemlərin yaranması ilə nəticələndi. Lakin son vaxtlar müəllimlərin təkmilləşdirilməsi, savadlı kadrların işlə təmin olunması istiqamətində addımlar atılır. Belə ki, eyni mahiyyəti daşıyan ali təhsil müəssisələrinin birləşdirilməsi, texnikom bitirənlərin ali təhsil müəssisələrinə asanlıqla transfer olunması istiqamətində işlər görülür. Ümid edək ki, bu kimi problemlər tezliklə öz müsbət həllini tapacaq”.
