QARABAĞLIYAM

Komandir, ver silahı, gedim yağı üstünə,

Onu dağdan aşırım, yıxım dağı üstünə.

Qazım, sonra da töküm o torpağı üstünə,

Azərbaycan oğluyam, mən də Qarabağlıyam.

Baxma vətənimdəyəm, vətəndən aralıyam.

Torpağım işğal altda, ürəyi yaralıyam.

Soruşma qurban olum, soruşma haralıyam,

Azərbaycan oğluyam, mən də Qarabağlıyam.

Lənkərandan gəlmişəm, Gəncəli balasıyam.

Nizami türbəsiyəm, Babakin qalasıyam.

Qeyrətimlə, qanımla torpağı alasıyam,

Azərbaycan oğluyam, mən də Qarabağlıyam.

Laçında, Kəlbəcərdə, Şuşada gözüm qalıb.

Xocalı, Xankəndində sönməyən közüm qalıb.

Hələ mənim düşmənə deyəsi sözüm qalıb,

Azərbaycan oğluyam, mən də Qarabağlıyam.

İzin ver o silahı götürüm, çıxım gedim.

Düşmənin sinəsinə süngünü sıxım gedim.

Orda düşmən yuvasın dağıdım, yıxım gedim,

Azərbaycan oğluyam, mən də Qarabağlıyam.

Yardımlı, Lerikliyəm, demək mən də dağlıyam,

Vətənin həm aranı, həm dağına bağlıyam.

Gərək ki Qubadlını gözüm üstə saxlayam,

Azərbaycan oğluyam, mən də Qarabağlıyam.

Sumqayıt, Bakılıyam, yolunda can vermişəm.

Xocalı, Xocavənddə torpağa qan vermişəm.

Mən indi Tərtərdəyəm, Ağdama yan vermişəm,

Azərbaycan oğluyam, mən də Qarabağlıyam.

Daş nədi, kəsək nədi, qranat ver, qranat.

Onsuz da ədalətə göz yumubdu kainat.

Şahmatda qələbədə, mata matdı, mata, mat,

Azərbaycan oğluyam, mən də Qarabağlıyam.

Mən də Beləsuvarlı Mubarizin nəsliyəm.

Gedin kökümə baxın mən də Kəlbəcərliyəm.

Mən də vətən yolunda ölməyə həvəsliyəm,

Azərbaycan oğluyam, mən də Qarabağlıyam.

Torpağıma göz dikən, gözünə həsrət qalar.

Yandırıb kül edərəm, közünə həsrət qalar.

Sevanı boşaldaram, gölünə həsrət qalar.

Azərbaycan oğluyam, mən də Qarabağlıyam.

Kurdəmirdə, Qazaxda, Saatlıda evim var.

Fizulisiz elə bil vətən mənə dardı, dar.

Zəngilan, Cəbrayıla qayıdaram bu bahar,

Azərbaycan oğluyam, mən də Qarabağlıyam.

Qarabağım, başına bu gün qara bağlayıb.

Yetər, yetər, bu dərdim daha yara bağlayıb.

Olmazlar bu səbrimi çəkib dara bağlayıb,

Azərbaycan oğluyam, mən də Qarabağlıyam.

Sədd nədi, sərhəd nədi, sərhədləri keçərəm.

Od nədi, atəş nədi, səngərləri keçərəm.

Düşmənin həddi nədi, mən hədləri keçərəm,

Azərbaycan oğluyam, mən də Qarabağlıyam.

Vətənimin hər qarış torpağı and yerimdi.

Hər yerdə dalğalanan bayrağı and yerimdi.

O köçkün çadırların, ocağı and yerimdi,

Azərbaycan oğluyam, mən də Qarabağlıyam.

Vətən imandan əvvəl, vətən doğuş yerimiz.

Vətən yer adlı candı, cana dönüş yerimiz.

Vətən qeyrət yolunda, bizim döyüş yerimiz,

Azərbaycan oğluyam, mən də Qarabağlıyam.

Anam dedi ay bala, vətən sənə əmanət.

Vətən mənim anama, mən vətənə zəmanət.

Məndədi o ləyaqət, məndədi o dəyanət,

Azərbaycan oğluyam, mən də Qarabağlıyam.

Qələbə marşı çalın, bir sarı simə bəndəm.

İlhamdı baş komandan, bilin mən kimə bəndəm.

Mənə komanda verin indi bir himə bəndəm,

Azərbaycan oğluyam, mən də Qarabağlıyam.

 

Etibar Vəliyev