Uşaqların məktəbə hazırlıq dövrü

Məktəbəqədər yaş dövründən məktəbə keçid dövrünə yenicə qədəmlərini qoyacaq olan uşaqlarda yaranacaq psixoloji problemlərin aradan qaldırılması üçün ilk addımlar, birinci növbədə valideynlərin üzərinə düşür. Uşaqlarda məktəb, dərs kimi anlayışlara qarşı neqativ fikrin yaranmasının qarşısını almaq və onlarda həyatlarında yeni mərhələ olan məktəbə qarşı sevgi, dərsə həvəsin necə yaradılması mərhələsi çox önəmlidir.

Uşaqları məktəbə, yeni fəaliyyət növünə necə hazırlamaq lazımdır?

Uşaqların məktəbə qədəm qoyduqları dövrə qədər fəaliyyəti yalnız müxtəlif növ oyunlardan ibarət olur. Artıq məktəbə getməyə başladıqda uşaq oyundan dərsə keçid dövrünü yaşamalı olur. Valideynlərin borcu bu keçid dövrünü mümkün qədər uşaqlar üçün yumşaq etməkdir. Əgər uşaq məktəbdən gələn kimi ondan dərslərini hazırlamaq tələb edilərsə, onda məktəbə qarşı istəksizliyin yaranması təbii haldır. Uşaqdan birdən-birə oyunu buraxmasını tələb etmək doğru deyil. Dərs hazırlamaq və oyun oynamaq mütləq növbəli şəkildə olmalıdır. Bu həm də uşaqda nizam-intizam vərdişi yaradır. Belə ki, əgər uşaq yarım saat dərs edirsə, yarım saat da oynamalıdır. Belə olduğu halda uşaq anlayacaq ki, oyundan, gündəlik rejimindən uzaqlaşmayıb. Bu oyun bir qədər fərqli şəkildə olsa da davam edir. Bu oyunda yeni şeylər öyrəniləcək, yeni biliklər qazanılacaq.

Dərs ilinin başlanması ilə uşaqlar fərqli rejimə keçirlər. Onların normadan artıq yorulmamaqları üçün gün rejimini necə qurmalı?

İlk növbədə qeyd etmək lazımdır ki, yuxu rejimini pozmaq olmaz. Əgər məktəbə gedənə qədər uşağınızın yuxu rejimi yox idisə, yəni istədiyi vaxt yatır, istədiyi vaxt oyanırdısa, məktəbə getməyə başladıqdan sonra bu vərdiş mütləq şəkildə yaradılmalıdır. Çünki uşaqlarda beyin artıq məntiqi bacarıqlar əldə etmək üzrə yeni fəaliyyət rejiminə keçir. Körpələrə yuxudan oyanmaq bir qədər çətin olduğuna görə, onlarda erkən oyanmaq vərdişlərini aşılamaq üçün və dərsdə yarıyuxulu olmasınlar deyə uşaqları dərsə bir saat qalmış oyatmaq lazımdır. Bəzən olur ki, uşaqlar ümumiyyətlə niyə erkəndən oyanmaq məcburiyyətində olduqlarını anlamırlar. Psixoloqların araşdırmalarına görə, erkən yaşlı uşaqlarda beyin yarımkürələri məhz səhər saatlarında aktiv olur və eşitdiyi yeni məlumatları qəbul etmək asan olur. Bu prosesdə valideynlərin üzərinə düşən əsas vəzifə uşaqları düzgün təlimatlandırmaq və axşam erkən saatlarında yatmağın vacib olduğunu onlara başa salmaqdır.

Məqalə Göndər