Təhsil Nazirliyi yanında İctimai Şuranın onlayn iclasında yeni dərs ilinə hazırlıq və tətbiq olunacaq qaydalar müzakirə edilib

Azərbaycan Respublikasının Təhsil Nazirliyi yanında İctimai Şuranın (İŞ) onlayn iclasını açan şuranın məsul katibi fəlsəfə doktoru İlqar Orucov müzakirəyə çıxarılan məsələlər barədə iclas iştirakçılarına məlumat verib.

Şuradan verilən məlumata görə, daha sonra şuranın sədri professor Şahlar Əsgərov yeni dərs ilinin başlanması münasibətilə şura üzvlərini və bütün təhsil ictimaiyyətini təbrik edib. Təhsil nazirinin müşaviri Elnur Nəsibov yeni tədris ilində tətbiq olunan yeni qaydalar barədə ətraflı məlumat verdi. Natiq bildirdi ki, xüsusi karantin rejimi dövründə təhsil müəssisələrində tədris və təlim-tərbiyə prosesinin təşkili barədə Nazirlər Kabinetinin qərarına müvafiq olaraq Təhsil Nazirliyi artıq tədris planlarını təsdiqləmişdir. Eyni zamanda yeni uyğunlaşdırılmış tədris planları və nümunəvi dərs cədvəlləri barədə nazirliyinin ümumi və məktəbəqədər təhsil şöbəsinin aparıcı məsləhətçisi Gülarə Xudiyeva çıxış etdi. Təhsil İnstitutunun direktor müavini Ülkər Babayeva 2020/2021-ci tədris ilində məktəblərin açılmasına dair aparılmış sorğunun nəticələrinə dair məlumat verərək bildirdi ki, sorğunun məqsədi COVİD-19 pandemiyası dövründə Azərbaycanda məktəblərin açılmasına dair əhalinin rəyini öyrənməklə, müvafiq şərtlər altında dərslərin aparılma formasına olan münasibəti və bu mövzuda gözləntilərin araşdırılıb təqdim olunmasından ibarətdir. Natiq qeyd etdi ki, sorğular telefon vasitəsilə aparılmış və ümumilikdə 5000 iştirakçını əhatə etmişdir. Araşdırma Bakı və ölkənin digər rayonlarında məktəblilər, məktəblilərin valideynləri, müəllimlər və digər hədəf qrupları arasında keçirilmişdir.

Şuranın sədri professor Şahlar Əsgərov, şura üzvlərindən əməkdar müəllim Asif Cahangirov, fəlsəfə doktoruları Anar Vəliyev, Ülviyyə Mikayılova, Elmina Kazımzadə professor Hikmət Əlizadə, Azərbaycan Təhsil İşçiləri Azad Həmkarlar İttifaqı Respublika Komitəsinin sədr müavini Mirzə Cəfərzadə yeni tədris ilində tətbiq olunacaq yeni qaydalarla bağlı fikirlərini bildirdilər. Şura üzvləri pandemiya dövründə təhsilalanlar üçün internet tariflərində ciddi güzəştlərin olunması, təhsilverənlərin ödənişsiz internetlə təmin olunması məsələsinin aidiyyatı qurumlar qarşısında qaldırılması məqsədilə təhsil nazirinin adına müraciətin edilməsini qərara aldılar. Daha sonra şuranın yeni tədris ilinin birinci yarısı üçün fəaliyyət planı müzakirə edildi.