Pedoqoji Universitetin rektoru tələbələrə əlçatandırmı...
Dünya təhsil sistemində universitet rektorları ilə tələbələr arasında olduqca səmimi münasibət mövcuddur. Bu faktı xaricdə, xüsusən də Avropa ölkələrində təhsil alan azərbaycanlı tələbələr də təsdiq edirlər. Rektorların tələbələr üçün əlçatan olması isə təhsilin inkişafına təsir edən amillər sırasına daxildir desək, yəqin yanılmarıq.
Görəsən Azərbaycan universitetlərində rektorların tələbələrlə münasibəti necədir? Və onların şikayətləri necə həll olunur? Onlar tələbələr üçün əlçatandırlarmı? Tələbələr öz rektorları ilə görüşə bilirlərmi?
Aztəhsil.com xəbər verir ki, modern.az-ın "Tələbələr rektor barədə” rubrikasında ayrı-ayrı universitetdə təhsil alan tələbələrin öz rektorları barədə fikirlərinə yer verilir.
Ötən dəfə tələbələr Neft və Sənaye Universitetinin rektoru barədə fikirlərini bölüşdülər.
İndi isə Azərbaycan Dövlət Pedoqoji Universitetinin (ADPU) tələbələri arasında sorğu keçirdik.
ADPU-nun hal hazırki rektoru Cəfər Cəfərov ölkə başçısının 23 iyun 2016-cı il tarixli sərəncamı ilə bu vəzifəyə təyin edilib.
Riyaziyyat və İnformatika fakültəsinin tələbəsi Elnur Babayev rektorları ilə şəxsən ünsiyyətdə olmayıb:
"Bizə şəxsən heç bir məsələdə köməkliyi dəyməyib. Azərbaycan Dillər Universitetinin rektoru əlavə qrupları və yay məktəblərini pulsuz edib. Amma bizdə əksidir. Fənlərin çoxu davamlıdır, kredit sayları çoxdur. 1 kredit 22 manatdır. İmtahan biletlərinin dəyişilməsinə icazə yoxdur. Tələbələrin buna etiraz etdiyini bilir və susur. Nəzarətçilər də imtahanlarda çox sərt davranırlar. Bunları bilə-bilə heç bir tədbir almayıb. Ona görə də rektordan razı deyiləm”.
Filologiya fakültəsinin tələbəsi Nərmin Baratlıya görə isə Cəfər Cəfərov keçmiş rektorlarına nisbətən çox yaxşıdır:
"Cəfər müəllimin bizim universitetə gələndən sonra ali məktəbdə qayda-qanunlar, görünüş, şərait çox dəyişib. Əvvəlki universitetdən əsər-əlamət yoxdur. Onunla şəxsən ünsiyyətdə olmamışam və kömək istəməmişəm. Amma əminəm ki, kömək edərdi. Sonunca dəfə 20 gün əvvəl qrupumuzun dərsinə gəlib və o zaman ünsiyyətdə olmuşam.
O, rektor gələndən sonra imtahan sistemi dəyişdirilib. Bu, bizə yox, birinci kurslara aiddir. Bizdə imtahan 2 mərhələli idi. İndi isə bir mərhələyə, yazılı imtahana keçirilib. Universitet çox köhnə idi, təmir edilib. Əvvəlki bufet pis vəziyyətdə idi, indi təmiz, səliqəli bufetimiz var. Bir sözlə, rektorumuzdan razıyam”.
Tələbə Sevinc Hüseynova qeyd edir ki, onun rektorla nə ünsiyyəti olub, nə də problemi.
Tarix və Coğrafiya fakültəsinin tələbəsi Vəli Vəlizadə indiyə qədər rektorla ən kiçik dialoqunun olmamasına baxmayaraq, ondan razıdır:
"1-ci kursda təhsil alıram. Elə bir problemim yaranmayıb və şəxsən müraciət etməmişəm”.
Adının çəkilməsini istəməyən və universitetdən qovulacağından qorxan Samirə Şükürova (şərti ad) yalnız universiteti bitirdikdən sonra açıqlama vercəcəyini və rektordan qəti şəkildə razı olmadığını bildirib:
"Heç rektorun adını belə, bilmirəm”.
İbtidai təhsil fakültəsinin tələbəsi Nişanə Xəlilova deyir ki, Cəfər Cəfərov ilə imtahan müddətində ünsiyyətdə olub.
"İmtahanda nəzarətə gəlmişdi. Problemimizin olub-olmadığını soruşdu. Səmimi insan kimi tanıyıram. Düzdür, özüm başqa korpusda oxusam da, bilirəm ki, daim tələbələrin içində olur və müntəzəm olaraq hamının problemi ilə maraqlanır. Bir sözlə, yaxşı insan kimi tanıyıram və razıyam”.
Aysel Qarayeva ümumiyyətlə ünsiyyətdə olmadığı və çox az hallarda gördüyü Cəfər Cəfərovdan razıdır.
"İndiyə qədər ünsiyyətdə olmasam da, Cəfər müəllimi çox yaxşı insan kimi tanıyıram. Daim tələbələrin yanında olmağa can atan biridir”.
Riyaziyyat və İnformatika fakültəsinin tələbəsi Sənan Şərif də rektorla yaxın ünsiyyətdə olmayıb:
"Rektorumuzdan razıyam. Digər tələbələrlə tez-tez ünsiyyətdə olduğu, onların şənliklərinə də, dərdlərinə də yaxından ortaq olduğu bilinir. Tək mənə yox, ehtiyacı olan bütün tələbələrə köməklik göstərməkdən çəkinmir”.
