Olimpiadalara qatılmaq şagirdlərə nə qazandırır? - TƏHSİL EKSPERTİ AÇIQLADI

“Olimpiadalara qatılmaq şagirdlərə nə qazandırır sualına bircə kəlmə ilə cavab versək - Çox şey. Ən başlıcası isə özünə inam və güvən, öz yaşıdları, müəllimləri və valideynləri qarşısında qürur və fəxarət hissi”. Bu sözləri SİA-ya açıqlamasında təhsil eksperti Nadir İsrafilov deyib.

Onun sözlərinə görə olimpiadalar istedadlı uşaq və gənclərin aşkara çıxarılmasında, onların həvəsləndirilməsi ayrı-ayrı fənlərə maraqlarının artmasında o cümlədən də təlimdə sağlam rəqabətin yaradılmasında müstəsna rol oynayır: “Olimpiadaların keçirilməsində əsas məqsəd şagirdlərdə keyfiyyətli təhsilalma, biliklərə nüfuz etmək və ayrı-ayrı fənlər üzrə istedadı və yaradıcı təfəkkürü ilə fərqlənənləri aşkar etməkdir”.

Nadir İsrafilov sözlərinə belə davam edib: “O da xüsusilə qeyd edilməlidir ki, son illər Respublikamızda olimpiada hərəkatı geniş vüsət alıb, istedadlı uşaqların aşkar olunması və onların mövcud potensiallarından məqsədyönlü istifadə edilməsi istiqamətində bir sıra layihələr həyata keçirilib. Olimpiada qaliblərinin mükafatlandırılması tanınmış ziyalılarımızın iştirakı ilə ən yüksək səviyyədə təşkil olunur və keçirilir.

Bu gün, istedadlı uşaqlarla iş və bu istiqamətdə görülən müxtəlif yarış, müsabiqə, yerli və beynəlxalq fənn olimpiadaları ümumi təhsilin ayrılmaz tərkib hissəsini təşkil etməklə, təhsilalanlarımıza yeni-yeni uğurlara imza atmaq üçün əlavə stimul yaradır.

Təcrübə göstərir ki, məhz istedadlı şagirdləri vaxtında aşkar etməklə, onların fərdi bilik, bacarıq və vərdişlərini qabiliyyətlərinə uyğun istiqamətləndirməklə gələcəkdə ölkə üçün peşəkar mütəxəssislər yetişdirmək olar, ixtisasından asılı olmayaraq səriştəyə əsaslanan şəxsiyyətyönümlü vətəndaş yetişməsinə nail olmaq mümkündür. Respublika üzrə Fənn Olimpiadalarının qaliblərinə ali məktəblərə qəbul zamanı güzəştlər edilməsi, beynəlxalq olimpiada qalibləri üçün müxtəlif dünya universitetlərinin qapılarının açıq olması bu sahəyə olan marağı daha da artırır”.