Ən yüksək ad -Dosent İlham Əhmədov

Bu ərəfədə Müəllimlərin Peşə Bayramı oldu. Bütün müəllimləri bu münasibətlə təbrik edirəm!

Müəllim pedaqoji prosesdə daim həlledici qüvvə kimi çıxış edib. Şəxsiyyətin ahəngdar inkişafı vəzifəsi, ilk növbədə, müəllimin üzərinə düşür.

Müəllim nəinki pedaqoji prosesdə, o cəmiyyətdə əsas simadır, o cəmiyyət həyatında çox böyük rol oynayır. O, yaşlı nəslin təcrübəsini gənc nəslə verir. Görkəmli şəxsiyyətlər müəllimin əməyinə yüksək qiymət vermiş, müəllimi günəşə, bağbana, mühəndisə bənzətmişlər. Çünki o, günəş kimi gənc qəlbi və ağlı işıqlandırır, uşaqlara bağban qayğısı göstərir, mühəndis kimi insan qəlbinin layihəsini cızır.

"Mən müəllimdən yüksək ad tanımıram” deyən ümummilli lider Heydər Əliyev hər zaman müəllimlərə dəyər vermiş, öz müəllimlərini xüsusi hörmətlə yad etmişdir.

Təhsil millətin gələcəyi, müəllim isə təhsil prosesinin əsas simasıdır. Cəmiyyətin, millətin gələcəyi bu mənada müəllimin əlindədir. Deyirlər ki, bir milləti məhv etmək üçün onun müəlliminin və həkiminin savadsız olması kifayətdir: biri milləti mənəvi cəhətdən, digəri isə fiziki cəhətdən şikəst edəcəkdir. Bu hal müəllim kadrlarının fasiləsiz hazırlığına, onların sosial vəziyyətinə xüsusi diqqət yetirməyi tələb edir.

Müəllim cəmiyyətdə, onun inkişafında çox şeyə məsul ola bilər, əğər cəmiyyət Müəllimə hər mənada yüksək dəyər və dəstək verərsə....

Sentyabrın 29-da ölkə Prezidenti cənab İlham Əliyev "2021-2022-ci tədris ilində Azərbaycan Respublikasının ali məktəblərinə daxil olmuş tələbələrə Prezident təqaüdünün verilməsi haqqında" sərəncam imzalayıb. Sərəncama əsasən, 2021-2022-ci tədris ilində tələbə qəbulu imtahanlarında ixtisas qrupları üzrə ən yüksək nəticələr göstərmiş və yerli ali təhsil müəssisələrinə daxil olmuş 102 tələbəyə Prezident təqaüdü veriləcək. Prezident təqaüdçülərinin Ali məktəblər üzrə bölgüsü belə idi:

Bakı Ali Neft Məktəbi 33

Azərbaycan Tibb Universiteti 25

Bakı Dövlət Universiteti 15

ADA 12

UNEC 8

Dövlət İdarəçilik Akademiyası 4

UFAZ 2

Xüsusi təyinatlı Ali məktəblər 2

Azərbaycan Dövlət Neft və Sənaye Universiteti 1

Bu siyahıdan məlum olur ki, yüksək ball toplayanların arasında pedaqoji ali təhsil müəssisəsini seçənlər yoxdur. Yəni, istedadlı gənclər müəllim və ya alim olmaq istəmirlər. Bu vəziyyət müəllim peşəsinin cəmiyyətdə nüfuzunun hansı səviyyəyə endiyini göstərir. Bu situasiyanın səbəbi müəllimin şəxsiyyəti yox, daha çox dövlətin müəllimə olan münasibətidir. Cəmiyyətdə nə vaxt müəllimə yüksək dəyər verilibsə, dövlət də inkişaf edib və əksinə, öz yaxın tariximizi xatırlamaq kifayətdir. Keçən əsrin 30-60-ci illərində sovetlərin inkişafı müəllimə qayğı və hörmətlə, 70-90-cı illərdəki tənəzzülü isə müəllimə soyuq münsibətlə yadda qalmışdır.

Müəllim və alim peşəsinin nüfuzdan düşməsi son illər aydın hiss edilir. Müəllimə və alimə, elm və təhsilə dəyər verməyən cəmiyyət və dövlətlərin müasir dünyamızda inkişafı əsla mümkün deyil. Müəllimə isti və səmimi münasibət sözdə yox, işdə olmalıdır. Dövlətin hansı peşəyə dəyər verdiyini bilmək üçün onun hansı peşəyə nə qədər maaş verdiyinə baxmaq kifayətdir. "Müəllimlərin maaşını nə qədər artırsanız yəqin ediniz ki, bundan bir şey itirməyəcəksiniz, çünki bizim varlığımız və gələcəyimiz ancaq müəllimlərin əlindədir. Müəllim nə qədər ac olsa, nə qədər gözü ətrafda və özgə əlində olsa, əlbət ki, o müəllim bir şey verə bilməz və o məktəbdən bir şey çıxmaz." (Nəsib bəy Yusifbəyli, ADR-nın Baş naziri və Maarif naziri).

Əgər Cəmiyyət öz gələcəyinə biganədirsə, təhsilə, müəllimə Layiq olduğu DƏYƏRİ vermirsə, belə vəziyyətdə cəmiyyətin müəllimdən ciddi nə isə tələb etməyə haqqı yoxdur.

M. K. Atatürk T.C. maliyyə nazirinin "millət vəkillərinə nə qədər maaş verək, paşam” sualını belə cavablandırmışdı: nə qədər istəyirsiniz verin, amma elə edin ki, müəllimlərin maaşından çox olmasın.

Cəmiyyət olaraq Millətin, dövlətin, gəncliyin gələcəyi naminə Müəllimlərimizi yüksək məqamlara yüksəldək. Onda millətimiz də, dövlətimiz daim yüksəkdə olar! BAYRAMINIZ MÜBARƏK!!!