Britaniyalı tələbələr imtahanların internetdə təşkilni istəyir
Böyük Britaniyanın Ali Təhsil Siyasəti İnstitutu (HEPI-The Higher Education Policy Institute) "YouthSight" şirkəti ilə ali təhsil müəssisələrinin əyani şöbələrinin 1000-dən çox tələbəsi və 500-dən artıq abituriyent arasında COVID-19 pandemiyasının onların təhsil həyatına necə təsir etməsinə dair tədqiqat aparıb. Tələbələr arasında keçirilən sorğulara əsasən, xüsusən də yuxarı kurslarda oxuyanlar imtahanların ləğv edilməməsini və onlayn keçirilməsini dəstəkləyiblər. Tələbələrin yalnız 36% - i koronavirusun baş verməsi səbəbindən ilin qalan hissəsi üçün qiymətləndirmələrin ləğv edilməsinin zəruri olduğunu düşünür.
İmtahanlar onlayn keçsin
Tələbələrin 42 faizi təhsil aldıqları universitetlərdə qiymətləndirmənin onlayn rejimdə davam etdirilməsini gözləyir, 17 faiz isə böhran başa çatana qədər imtahanların ləğv edilməsinə üstünlük verir.
Tələbələrin Milli Birliyi adlı qurum pandemiya ilə əlaqədar olaraq ali məktəbləri I və II kurs tələbələri üçün imtahanları ləğv etməyə, son kursun məzunlarından ötrü isə onların əvvəlki nailiyyətləri əsasında qiymətləndirmə aparmağa çağırıb.
Anket, həmçinin tələbənin hansı yaşda olmasından asılı olaraq perspektivdə cüzi bir dəyişikliyin olduğunu göstərib: birinci kurs tələbələrinin 44, ikinci kurs tələbələrinin 32, III kurs tələbələrinin 31 faizi qiymətləndirmələrin ləğv edilməsini düşünür.
Anketə görə, tələbələrin əksəriyyəti universitetlərin onlarla ünsiyyət qurmasından məmnundur: 70 faiz ali təhsil müəssisəsinin koronavirus haqqında əldə etdiyi məlumatın aydın və ya çox aydın olduğunu, 18 faiz isə aydın və ya tamamilə aydın olmadığını ifadə edib.
Tələbələr onlayn təlimdən razı qalıb
Sorğu onu da göstərib ki, rəyi soruşulan tələbələrin 49 faizi əyani təhsil əvəzinə, təhsil aldıqları ali məktəbin təqdim etdiyi onlayn təlimdən razı qalıb. Tələbələrin 23 faizi təhsilin bu formasından narazı olub, 29 faizi isə razı və ya narazı olduğunu dəqiqləşdirə bilməyib.
HEPİ həm də universitetlərin 500 abituriyenti arasında da sorğu keçirib və müəyyən olunub ki, onların 29 faizi pandemiyanın təsirindən seçdikləri universitetdə yer alacaqlarına az inamlıdırlar.
Bu il A səviyyəli imtahanlar ləğv olunduğundan, şagirdlər müəllimlərin qiymətləndirməsi, sinfin reytinqi və məktəblərinin əvvəlki nəticələri əsasında qiymət alacaqlar.
Sorğu göstərib ki, tələbələrin 20%-i indi daha çox əmindirlər ki, seçdikləri müəssisələrdə yer alacaqlar.
Pandemiya tələbələrin seçiminə heç bir təsir göstərməyib
Ehtimal edilir ki, tələbələrin yalnız 7 faizi koronavirusa görə ilk universitet seçimini dəyişdirəcək; 70 faiz isə bildirib ki, pandemiya onların seçiminə heç bir təsir göstərməyib.
HEPİ-nin siyasət və təbliğat məsələləri üzrə direktoru Reyçel Hyuitt bildirib ki, nəticələr pandemiya dövründə universitetlərin tələbələri və abituriyentləri çox yaxşı dəstəklədiyini göstərir.
"Onlayn təhsilin əhatəsini çox tez genişləndirməyimizə baxmayaraq, təhsil aldıqları qurumlardan narazı qalanların sayı azlıq təşkli edir. Həm abituriyentlər, həm də tələbələr pandemiya ilə bağlı dəqiq məlumatlara sahib olduqlarını hiss edirlər ",-deyə R. Hyuitt bildirib.
Onun sözlərinə görə, ali məktəbə qəbul zamanı abituriyentlərə büdcə yerləri ilə əlaqədar böyük əminlik lazımdır: "Çox vacibdir ki, hazırkı dövrdə məktəbdən kənarda qalanlar öz seçimlərinə görə universitetlərdən xaricdə qalmasınlar. Məlumatlar göstərir ki, bu məsələ abituriyentlərin kifayət qədər az hissəsi üçün narahatçılıq doğurur".
Böyük Britaniyanın Universitetlər və Kolleclər Birliyinin baş katibi Co Qreydi abituriyentlərin hazırkı təhsil mərhələlərində yaranan əlverişsiz durumdan əziyyət çəkdiklərini və universitetə getdikləri zaman dəstəyə ehtiyac duyduqlarını bildirib: "Biz dəstək və təhlükəsizlik şəbəkələrini təmin etməliyik ki, tələbələr koronavirus böhranına görə əlverişsiz vəziyyətə düşməsinlər. Universitetlərdən zəmanət almaq istəyirik ki, öz nəticələrindən şikayət etmək və ya imtahan vermək istəyən tələbələr bu prosesdən keçərkən öz yerlərini universitetdə saxlaya bilsinlər".
