Lənkəran-Astara Regional Təhsil İdarəsinin 2024-cü il uğurları: 200-dən çox şagird və müəllim təltif olundu
2024-cü il uğurları ilə yadda qalan Lənkəran-Astara Regional Təhsil İdarəsi tərəfindən şagird və müəllimlərin əldə etdiyi uğurların qeyd olunması məqsədilə təltifetmə mərasimi keçirildi. Tədbir çərçivəsində ilk olaraq şagirdlərin əl işləri və qalib layihələrdən ibarət sərgi nümayiş olundu.
Təltifetmə mərasimi şəhidlərimizin əziz xatirəsini bir dəqiqəlik sükutla yad etməklə və Dövlət Himninin səsləndirilməsi ilə başladı.
Lənkəran-Astara Regional Təhsil İdarəsinin müdiri Bəhruz Mehdiyev tədbir iştirakçılarını salamlayaraq təhsilin inkişafında görülən işlərdən, cari ilin nailiyyətlərindən və qarşıdakı hədəflərdən bəhs etdi. O, müəllim və şagirdlərin daha böyük uğurlara imza atacaqlarına inandığını vurğulayaraq onlara uğurlar arzuladı.
Mərasimdə region, respublika və beynəlxalq səviyyəli bilik yarışları, təqdimat və yaradıcılıq müsabiqələrində qalib gələn şagirdlər və onların müəllimləri, həmçinin təlim-tərbiyə sahəsində fərqlənən pedaqoqlar fəxri fərmanlarla mükafatlandırıldı. İki müəllim isə "Azərbaycan Respublikası qabaqcıl təhsil işçisi" döş nişanı ilə təltif olundu.
Tədbirdə S.Əliyev adına Haftoni qəsəbə tam orta məktəbin şagirdlərinin təqdim etdiyi “Xarıbülbül” rəqsi xüsusi maraqla qarşılandı və mərasimə rəng qatdı.
Daha böyük nailiyyətlərlə yenidən bir araya gəlmək ümidi ilə tədbir sona çatdı.
