Xəbərlər / Müəllim
20 dekabr 2016
5 090
Şəhadətnaməni attestatla əvəz etdik. Farslar demiş, xub...
Biilmirəm mən düz başa düşmürəm, yoxsa məni düz başa düşməyəcəklər. Şəhadətnaməni attestatla əvəz etdik. Farslar demiş, xub... Sonra dedik ki, müxtəlif səbəblərdən təhsilin hər hansı pilləsini və səviyyəsini başa vurmayan şəxslərə arayış veriləcək. Tam orta təhsil səviyyəsi üzrə müvafiq sinfi bitirdikdən sonra təhsilini davam etdirməyən və ya hər hansı dərs ilində dərs məşğələlərində iştirak etmədiyi üçün fənn (fənlər) üzrə biliyi qiymətləndirilməyən və ya fənn (fənlər) üzrə illik qiyməti 2 olan buraxılış sinif şagirdləri yekun attestasiyaya, o cümlədən buraxılış imtahanına buraxılmırlar. İndi deyirik ki, IX siniflər üzrə buraxılış imtahanında hansı qiymət almasından asılı olmayaraq, şagird attestat alacaq. İmtahanın nəticələrinə əsasən şagirdlər orta ixtisas təhsili müəssisələrinə sənəd verə biləcəklər. Əgər attestat almaqda imtahan qiymətinin rolu yoxdursa, bu qışın soyuğunda, yayın istisində uşağın imtahan verməsinin və ya nəticəsi müsbət olmayan şagirdin 10 və 11-ci sinifi oxuya bilib bilməyəcəyinin nə anlamı var. Elə götürək bütün anlaşılmazlıqlara yol açan ümumi orta təhsil və tam orta təhsil səviyyəsi üzrə dövlət təhsil sənədinə yazılacaq yekun qiymətin çıxarılması qaydasını.
1) buraxılış imtahanı aparılan hər bir fənn üzrə şagirdin buraxılış sinfinin yekun (illik) qiyməti və buraxılış imtahanının balı;
2) buraxılış imtahanı aparılmayan hər bir fənn üzrə şagirdin buraxılış sinfinin yekun (illik) qiyməti.
Tam orta təhsil səviyyəsində təhsil sənədinə yazılacaq yekun qiymət isə Mərkəz tərəfindən aşağıdakı qaydada çıxarılır:
- buraxılış imtahanı aparılan hər bir fənn üzrə şagirdin buraxılışdan əvvəlki və buraxılış siniflərinin yekun (illik) və buraxılış imtahanının qiymətlərinin ədədi ortası
- buraxılış imtahanı aparılmayan hər bir fənn üzrə şagirdin buraxılışdan əvvəlki və buraxılış siniflərinin yekun (illik) qiymətlərinin ədədi ortası
- Qiymətlərin ədədi ortası tam ədəd olmazsa, tam ədədə yuvarlaqlaşdırılır.
Bu zaman, atılan rəqəm 5-dən kiçik olarsa, ondan əvvəlki rəqəm dəyişmir, 5 və ya daha böyük olarsa, ondan əvvəlki rəqəm bir vahid artırılır.
- Ümumi orta təhsil səviyyəsi üzrə müvafiq sinfi bitirdikdən sonra təhsilini davam etdirməyən və ya hər hansı dərs ilində dərs məşğələlərində iştirak etmədiyi üçün fənn (fənlər) üzrə biliyi qiymətləndirilməyən buraxılış sinif şagirdləri yekun attestasiyaya, o cümlədən buraxılış imtahanına buraxılmırlar.
- Tam orta təhsil səviyyəsi üzrə müvafiq sinfi bitirdikdən sonra təhsilini davam etdirməyən və ya hər hansı dərs ilində dərs məşğələlərində iştirak etmədiyi üçün fənn (fənlər) üzrə biliyi qiymətləndirilməyən və ya fənn (fənlər) üzrə illik qiyməti 2 olan buraxılış sinif şagirdləri yekun attestasiyaya, o cümlədən buraxılış imtahanına buraxılmırlar” vəs. və i.a.
Deyirəm hər bir orta məktəbi bitirənə elə bir- başa imtahansız-filansız attestat verək ki, həm uşaqların canı qurtarsın məşəqqətdən həm də bizim canımız bu sorğu-sualdan.
Uzunçuluq edib başağrısı verdiyim üçün üzürlü hesab edin. Yadıma rəhmətlik Talıb Şərifov düşmüşdü. Misir Mərdanovun "erasında” buna bənzər bir qaydalar tətbiq etmişdilər. Nə bilim nəyi nəyə vurub, nədən nəyi çıxııb, nəyin üstünə nə gəlib, nəyi yuvarlaşdırıb, nə bilim həndəsi silsilə iləmi, ədədi silsilə iləmi nəyinsə ortasını tapmaq. Bütün direktorlar çaşbaş qaldı, attestatlar korlandı. Nəticəsi də o oldu kİ. attestatların təqdim olunması səlahiyyətini məktəb direktorlarından alıb nazirliyin səlahiyyətinə keçirdilər, bütün günahları da Monitorinq və Qiymətləndirmə şöbəsinin müdiri rəhmətlik Talıb Şərifovun üstünə yıxıb vəzifədən kənarlaşdırdılar. Allah Talıb Şərifova rəhmət eləsin...
Nadir İsrafilov Təhsil üzrə ekspert
