Xəbərlər
02 iyul 2019
2 440
Məktəb bufetlərini işlədənlər niyə yoxlamalardan keçmirlər - SƏBƏB
Əksər şagirdlər yay tətili ərzində sağlam qidalanandıqlarına görə, orta məktəbin qidalanma rejiminə keçdikdə müəyyən problemlərlə üzləşirlər. Bufetdə satılan məhsulların keyfiyyətsizliyi bu problemlərin əsas səbəblərindəndir.
Çox vaxt məktəblərdəki bufet və yeməkxanalar icarəyə verilmə yolu ilə fəaliyyət göstərir. İcarəhaqqı ödənildiyinə görə, bəzən müəyyən yoxlama və nöqsanların aradan qaldırılmasından da yan keçirlər.
Əslində isə qanunvericiliyə uyğun olaraq, məktəb bufet və yeməkxanaları, hətta buranın işçiləri üçün müəyyən yoxlamalar həyata keçirilməlidir. Yoxlamaya əsasən, yeməkxana işçilərinin tələblərə cavab verib – vermədiyi aydınlaşdırılır.
AzEdu.az bildirir ki, məktəb bufet və yeməkxanalarının fəaliyyəti "Təhsil müəssisələrində iaşənin və tibbi xidmətin təşkili Qaydaları”na əsasən həyata keçirilir. Bu qaydalar mülkiyyət formasından və tabeliyindən asılı olmayaraq, bütün təhsil müəssisələrinə şamil olunur. Məktəb rəhbərləri bu Qaydaların tələblərinə əməl edilməsinə görə məsuliyyət daşıyırlar.
Qayadalara əsasən, iaşə obyektləri bufet və yeməkxana formasında təşkil edilir.
İaşə xidməti təhsil müəssisəsi ilə hüquqi və fiziki şəxslər arasında bağlanan müqavilə ilə qanunvericiyə uyğun təşkil edilir.
Təhsil müəssisələrindəki iaşə obyektlərinin sanitariya-texniki vəziyyəti, xammal və məhsulların saxlanma şəraiti, istehsalat rejimi, istehsalat sahələri, avadanlıqlar və s. sanitariya qaydalarına uyğun olmalıdır.
Qida blokunun işçiləri işə qəbul edilərkən Səhiyyə Nazirliyi dövri tibbi müayinələrdən keçməlidirlər. Buraya mətbəx, ərzaq məhsulları anbarı, qida qəbulu zalı, bufet, yeməkxanada çalışanlar daxildirlər.
Aşağıdakı diaqnozlar qoyulan şəxslər yeməkxana və bufetlərə işə qəbul olunmurlar. Artıq işləyənlər isə tam sağalanadək işdən kənarlaşdırılırlar:
- Qarın yatalağı, paratiflər, salmonellyoz, dizenteriya ilə xəstələnmə və basil gəzdirmə;
- Himenolipidoz, enterobioz;
- Sifilis (yoluxucu dövrdə);
- Cüzam;
- Yoluxucu dəri xəstəlikləri, qoturluq, trixofitiya, mikrosporiya, favus, bədənin açıq sahələrində,
-Ağciyər vərəminin yoluxucu və destruktiv formaları, ciyərdən kənar vərəm, bakteriya,
-Üzün və əllərin vərəm qurdeşənəyi;
-Qonoreya (bütün formaları);
-Dərinin irinli xəstəlikləri.
Qida blokunun işçiləri ən geci iki ildən bir sanitariya-gigiyena minimumları üzrə hazırlıq kursları keçməlidirlər.
