Bu institutun elmi nəticələri ali məktəblərin tədris proqramlarında tətbiq olunub
Azərbaycan Milli Elmlər Akademiyası (AMEA) akademik Z.Bünyadov adına Şərqşünaslıq İnstitutunun əməkdaşlarının 2017-ci ildə apardıqları elmi tədqiqatların nəticələri müxtəlif ali təhsil müəssisələrinin şərqşünaslıq fakültələrinin tədris proqramlarında tətbiq olunub.
İnstitutdan bildirilib ki, eyni zamanda, bu elmi nəticələrdən Şərqin bir sıra ölkələrinin tarixinə, ictimai-siyasi həyatına, fəlsəfəsinə, dini durumuna, filologiyasına aid fərdi və kollektiv tədqiqatlarda istifadə edilib. Bununla yanaşı, Bakı Dövlət Universitetinin ilahiyyat fakültəsinin IV kurs tələbələri və "SABAH” qruplarında təhsil alan tələbələr institutda təcrübə keçiblər.
Ötən il institutda 18 kitab, monoqrafiya və məqalələr toplusu çap olunub. Həmçinin institut əməkdaşlarının 250-dən artıq məqalə, məruzə və tezisi nəşr olunub. Bunlardan 17 elmi məqalə xarici ölkələrdə (Rusiya, Özbəkistan, Hindistan, Ukrayna, Türkiyə, Rumıniya və s.) dərc edilib. İnstitut əməkdaşları 20 dəfə xaricdə, 108 dəfə isə Azərbaycanda keçirilən beynəlxalq elmi konfranslarda məruzə ediblər.
İl ərzində institutun 7 dissertantı fəlsəfə doktorluğu dissertasiya işi müdafiə edib. Onlardan 3-ü institutun əməkdaşıdır.
