“eTwinning Plus” layihəsi çərçivəsində seminar
"eTwinning Plus” layihəsi çərçivəsində Gürcüstanın Tbilisi şəhərində "Müəllimlərin elektron –virtual əlaqəsi” adlıseminar keçirilib.
Aztəhsil.com xəbər verir ki, seminarın əsas məqsədi "eTwinning Plus” layihəsi çərçivəsində müasir tədris metodologiyalarının tətbiqinin müzakirəsi və bu sahədə təcrübə mübadiləsinin aparılması olub.
Seminarda İsmayıllı rayon 1 nömrəli tam orta məktəbin müəllimləri Surə Mehdiyeva və Şükufə Nəcəfova iştirak edib.
Tədbirdə "eTwinning Plus” layihəsi çərçivəsində fəaliyyət göstərən müəllimlərin bilik və bacarıqlarının artırılması üzrə təlimlər də təşkil olunub.
Qeyd edəki ki, hazırda "eTwinning Plus” layihəsinə respublika üzrə 123 məktəb, 355 müəllim cəlb olunub.
Layihə çərçivəsində müəllimlərin bilik və bacarıqlarının artırılması üzrə onlayn təlimlər, Avropa ölkələrində müxtəlif seminar və konfranslar təşkil edilir. Cari ildə 81 müəllim 115 onlayn kursda iştirak edib və beynəlxalq sertifikatlar qazanıb.
Onu da qeyd edək ki, layihə Təhsil Nazirliyi nəzdində Təhsil Sisteminin İnformasiyalaşdırılması İdarəsi tərəfindən reallaşdırılır.
