![](/templates/everydayyeni/images/aygunbaner.png)
Keçən tədris ilində MİQ-dən bir oğlan “uşağımız” “dünyaya gəldi”...
Müsəlman ölkələrində, o cümlədən Azərbaycanda ailələr daha çox oğlan uşaqları arzulayırlar. Ailədə dalbadal iki qız uşağının dünyaya gəlməsi az qala fəlakət həddinə çatdırılır. Axı bu oğlan uşaqlarının qızlardan hansı üstün cəhətlər var ki, onlara daha çox üstünlük verilir?.. İlk dəfə olaraq 2013 – 2014-ci tədris ilindən etibarən MİQ-dən işlədiyim məktəbə gənc müəllim kadrlar təyinat almağa başlayıblar. Ardıcıl olaraq iki tədris ili ərzində iki gənc müəllimə kollektivimizə qatıldı. Bunların gəlişi kollektivimizə yeni rəng və təravət qatdı. Şübhəsiz ki, gələn yeni kadrlar tam fərqli xüsusiyyətlərə malik idilər. İxtisasları üzrə kifayət qədər biliklərə malik, fəal təlimin forma və xüsusiyyətləri üzrə daha çevik bacarıqlara malik olmaq nöqteyi-nəzərindən bu kadrlar mənim üçün sanki, göydəndüşmə idi. Bu kadrları həvəsləndirmək, onlara yeni stimul verməkdən ötrü nəsə bir şey etmək lazım idi. Direktorumuzla razılaşandan sonra məktəbdə yaşlı nəsil müəllimlərinin açıq dərslərini təşkil etmək qərarını verdik. Məqsəd ondan ibarət oldu ki, gələn gənc müəllimlər yaşlı müəllimlərin dərslərini dinləyirlər və dərs bitdikdən sonra özlərinin tənqidi mülahizələrini söyləyirlər. Qəribə və həm də maraqlı bir şey alındı. Təsəvvür edin təcrübəli müəllim, lakin onun üçün yeni olan fəal təlim metodları. Digər tərəfdən isə yeni kadrlar, lakin fəal təlim metodlarını bizdən yaxşı mənimsəmiş gənc müəllimlər.... Direktorla belə danışdıq ki, obyektivlik naminə gənc müəllimlər əvvəl qoy biz ikimizin dərsini dinləsinlər, sonra isə sıravi müəllimlərin. Direktorumuz əvvəlcə razılaşmasa da, sonradan razılıq verdi...Gənc müəllimlərə xüsusi tapşırıq verdim ki, güzəşt söhbəti ola bilməz. Dərsləri dinləyirsiniz və gördüyünüz bütün çatışmayan cəhətləri, qüsurları çılpaqlığı ilə deyirsiniz..Və başladıq, nə başladıq..Birinci özümdən başladılar, sonra direktordan, axırda sıravi müəllimlərdən. Bunun üçün xüsusi qrafik tərtib etdim və bütün tədris ili ərzində bu proses davam etdi. Təsəvvür edirsinizmi bu gənc kadrlar məni və direktoru necə tənqid edirdilər, nə yemisən turşulu aş..Gözəl də effekt verdi. Bu müəllimlərdən biri sinif müəllimi idi. Təsəvvür edirsinizmi bir ildən sonra bu sinif müəllimənin sinfi digər siniflərdən yaxşı tərəfə köklü sürətdə fərqlənirdi. Heyhat...Əfsuslar olsun... Üstündən iki il keçir...Və bu gənc kadrlar əlimizdən çıxır..Hər ikisi ailəli olduğundan analıq məzuniyyətinə yollanırlar... Gənc analar bizim canımız və qanımızdır...Lakin Allah onlara insaf versin ki, əzab əziyyətimiz getdi badə...Barı ailə "problem”lərinizi qaydasına qoyub, sonra məktəbə gəlin... Keçən tədris ilində MİQ-dən bir oğlan "uşağımız” "dünyaya gəldi”...Onu heç kimə verməyəcəyik...