Xaçmazda- Beynəlxalq Müəllimlər Günü münasibətilə tədbir keçirilib
5 oktyabr – Beynəlxalq Müəllimlər Günü münasibətilə tədbir keçirilib.
AzTehsil.com xəbər verir ki, Xaçmaz Rayon İcra Hakimiyyəti və Quba-Xaçmaz Regional Təhsil İdarəsinin birgə təşkilatçılığı ilə Beynəlxalq Müəllimlər Gününə həsr olunmuş tədbir keçirilib.
İştirakçılar əvvəlcə Ümummilli Lider Heydər Əliyevin abidəsini ziyarət edərək, onun əziz xatirəsini dərin ehtiramla yad ediblər. Ardınca məktəblilərin hazırladığı əl işlərindən ibarət sərgiyə baxış keçirilib.
Rəsmi hissə Dövlət Himninin səsləndirilməsi ilə başlanıb, Ulu Öndərin və şəhidlərin ruhu bir dəqiqəlik sükutla yad olunub.
Çıxış edən Xaçmaz Rayon İcra Hakimiyyətinin başçısı Elnur Rzayev və Quba-Xaçmaz Regional Təhsil İdarəsinin müdiri Coşqun Əliyev müəllimləri təbrik edərək, onların cəmiyyətin formalaşmasında və gələcək nəsillərin yetişdirilməsində mühüm rolunu vurğulayıblar. Qeyd olunub ki, dövlətin təhsil sahəsinə göstərdiyi xüsusi diqqət və qayğı nəticəsində müəllimlərin sosial müdafiəsi gücləndirilir, məktəblərin maddi-texniki bazası isə daim inkişaf etdirilir.
Daha sonra şəhid ailələrinin üzvləri və təhsil veteranları çıxış edərək, müəllimlik peşəsinin ucalığından söz açıb, dövlət rəhbərliyinə göstərilən dəstəyə görə minnətdarlıqlarını ifadə ediblər.
Tədbirdə bir sıra müəllimlər “Azərbaycan Respublikasının qabaqcıl təhsil işçisi” döş nişanı, həmçinin Elm və Təhsil Nazirliyinin, Xaçmaz Rayon İcra Hakimiyyətinin və Quba-Xaçmaz Regional Təhsil İdarəsinin fəxri fərmanları ilə təltif olunublar.
Sonda bədii proqram təqdim olunub. Uşaq-gənclər inkişaf mərkəzlərinin yetirmələri musiqi və rəqs nümunələri ilə çıxış edərək tədbirə xüsusi rəng qatıb.
