AzMİU-nun Türkiyədə təbliğatı kampaniyası uğurla tamamlanıb

Azərbaycan Memarlıq və İnşaat Universitetinin (AzMİU) dekanı və əməkdaşlarının universiteti tanıtmaq məqsədi ilə Türkiyə Respublikasında keçirdiyi görüşlər yekunlaşıb. Xəbər verdiyimiz kimi, İqdırda, Qars və Ağrıda keçirilən görüşlərin davamı olaraq əməkdaşlarımız Van, Siirt və İstanbulda maraqlı görüşlər keçiriblər.

Vanda Anadolu liseyinin konfrans zalında keçirilən görüşdə Türkiyənin Təhsil Nazirliyinin yüksək vəzifəli dövlət məmurları da iştirak ediblər. Nazırlik rəsmiləri zalda toplanmış məzunlara seçim zamanı doğru addım atmağı, universitetlər arasından ən yaxşılara üstünlük verməyi məsləhət görüb.

AzMİU-nun Əcnəbi vətəndaşların hazırlığı fakültəsinin dekanı Gülnarə Əsgərəlizadə universitet, tarixi, fakültə və ixtisasları, beynəlxalq əlaqələri əcnəbi tələbələrə yaradılan imkanlar, təqaüd qazanmaq fürsətləri və digər məsələlər barədə məzunlara ətraflı məlumat verib. O, təmsil etdiyi universitetdə Türkiyənin müxtəlif bölgələri ilə yanaşı, Van və Ağrıdan olan tələbələrin üstünlük təşkil etdiyini də iştirakçıların diqqətinə çatdırıb, məzunlara AzMİU-nu seçməyi tövsiyə edib. Görüşün sonunda AzMİU-ya həsr olunmuş tanıtım filmi nümayiş olunub, məzunların sualları cavablandırılıb.

Nümayəndə heyəti Vandan sonra Siirtdə, İstanbulda da görüşlər keçiriblər. Siirtdə İbrahim Haqqı Anadolu İmam Hatip liseyində keçirilən görüşdə əməkdaşlarımız əcnəbilərin universitetə qəbul qaydaları, fakültə və ixtisaslarla bağlı açıqlamalar veriblər. İstanbulda xaricdə təhsil şirkətlərinin rəhbərləri ilə keçirilən görüşdə növbəti tədris ilində əcnəbi tələbələrin AzMİU-nu seçməsi üçün danışıqlar aparılıb, qarşılıqlı razılıq əldə olunub, onlara universiteti tanıdan buklet və broşürlər paylanıb.