İLHAM ƏHMƏDOV-“4-cü Sənaye İnqilabı dövründə Yeni Təhsil” müzakirələrinə ehtiyac var.

Məlum olduğu kimi, bu ərəfədə mədəniyyətimizin paytaxtı Şuşa şəhərində “4-cü Sənaye İnqilabı dövründə Yeni Media”  adlı möhtəşəm Şuşa Qlobal Media Forumu keçirildi. Azərbaycan Prezidenti İlham Əliyevin  Media nümayəndələri  qarşısında çıxışı və onların  suallarına cavabı  çox maraqlı və yadda qalan oldu.

4-cü Sənaye İnqilabı bütün sahələrdə ciddi transformasiya proseslərinə  təkan vermişdir. Yeni Sənaye İnqilabı  Təhsil üçün  də unikal  innovativ  imkanlar yaradıb. 

Artıq 25 ildən çoxdur bütün mütərəqqi ölkələr  öz təhsil sistemində mərhələlərlə informatlaşma, elektronlaşma, rəqəmsallaşma kimi texnologiyaları uğurla tətbiq etmişlər. Distant təhsil kimi universal təhsil texnologiyası məhz bu proseslərin nəticəsi kimi yaranmış və sürətlə inkişaf etməkdədir. 

Təhsilin incəliklərini  bilən bütün peşəkar TOP menecerlər öz ölkələrində, öz işlədikləri universitetlərdə  artıq 25  ildir ki,  bu innovatıv təhsil texnologiyasını tətbiq edirlər. 

Bu gün təhsilin rəqəmsal transformasiyası bütün aparıcı universitetlərin inkişaf  strategiyasının əsasını təşkil edir. 

Bizim təhsil sistemi  təəssüf ki, bu innovativ meyllərdən uzun müddətdir ki, kənarda qalıb. Milli təhsil sistemimizin gec də olsa bu proseslərə qoşulması zəruridir. 

Müxtəlif qlobal təhsil reytinqlərində təhsilimizin geridə olmasının əsas səbəblərindən biri də onlayn təhsil texnologiyalarından çox zəif istifadə etməyimizdir. 

Hələ 20 il öncə neft kapitalının insan kapitalına çevrilməsi strategiyası müəyyənləşəndə, biz bu addımı atmalı idik.  İnsan kapitalının formalaşması məhz distant, virtual, smart təhsil texnologiyaları ilə  reallaşmalı idi. 

Təklif edirəm ki, Mədəniyyətimizin paytaxtı olan  Şuşa şəhərində  keçiriləcək növbəti Qlobal  forumlardan biri də  “4-cü Sənaye İnqilabı dövründə Yeni  Təhsil” mövzusunda olsun.

Bu forumda yeni sənaye inqilabı dövründə  insan kapitalının formalaşması üçün  rəqəmsal texnologiyalardan istifadə məsələləri müzakirə edilsin.

Bu forumun ölkəmizdə təhsilin inkişafına təkan verəcəyinə inanıram.