Dövlət qulluğu vəzifələri üzrə imtahanların nəticələri açıqlanıb
Dövlət İmtahan Mərkəzi (DİM) tərəfindən iyunun 19-da kağız daşıyıcılar vasitəsilə dövlət qulluğunda inzibati icraçı (B növü) vəzifələrə qəbul üzrə keçirdiyi test imtahanının, həmçinin inzibati icraçı vəzifələrə aid olan BB vəzifə qruplarına uyğun vəzifələr üzrə dövlət qulluğunda fəaliyyətin davam etdirilməsi imtahanının nəticələri açıqlanıb.
Bu barədə DİM-dən məlumat verilib. Namizədlər DİM-in saytında yerləşdirilmiş müvafiq linklər vasitəsilə imtahan nəticələri ilə tanış ola bilərlər.
Namizədlər imtahanın nəticələri haqqında məlumatı, mobil operatorlar (Azercell, Bakcell, Nar, Naxtel) vasitəsilə “iş nömrəsi”ni 7727 nömrəsinə göndərməklə də öyrənə bilərlər.
Dövlət qulluğuna qəbul imtahanında 2105 nəfər iştirak edib. İmtahanın nəticələrinə əsasən, BA1 altqrupu üzrə 6 nəfər, BA2 altqrupu üzrə 22 nəfər, BA3 altqrupu üzrə 45 nəfər, BA4 altqrupu üzrə 78 nəfər, BB1 altqrupu üzrə 115 nəfər, BB2 altqrupu üzrə 138 nəfər, BB3 altqrupu üzrə 171 nəfər, BB4 altqrupu üzrə 230 nəfər olmaqla, ümumilikdə 805 namizəd tələb olunan müsabiqə şərtlərini ödəyərək uğur qazanıb.
Dövlət qulluğunda fəaliyyətin davam etdirilməsi imtahanında isə 155 namizəd iştirak edib. İmtahanın nəticələrinə əsasən, BB1 altqrupu üzrə 26 nəfər, BB2 altqrupu üzrə 42 nəfər, BB3 altqrupu üzrə 45 nəfər, BB4 altqrupu üzrə 29 nəfər olmaqla, ümumilikdə 142 namizəd tələb olunan müsabiqə şərtlərini ödəyərək uğur qazanıb.
Test imtahanından müvəffəqiyyətlə keçən namizədlərə altqruplara daxil olan vəzifələrə uyğun olaraq sertifikat veriləcək. Sertifikatın qüvvədə olma müddəti 5 ildir.
Hər iki növ imtahan nəticələri ilə bağlı Apellyasiya komissiyası iyunun 21-23-də saat 14:00-dan 17:00-dək DİM-də fəaliyyət göstərəcəkdir. Ünvan: Bakı şəhəri, Nəsimi rayonu, Akademik Həsən Əliyev küçəsi, 299.
