Dərslərin sentyabrın 1-dən başlaması təklif olunur

"İyunun 16-dan başlayan "Yay məktəbi" özünü doğrultdu. Düzdür, qarşıya qoyulmuş hədəflərə tam olaraq çatmaq mümkün olmasa da, nəticə pis deyil".

Bunu Reyting.az-a açıqlamasında təhsil eksperti Kamran Əsədov deyib.

K. Əsədov bildirib ki, "Yay məktəbi”nin təşkilində ən vacib məqsəd və hədəf şagirdlərdə bir ildən çox müddət ərzində pandemiya səbəbindən bir-birilə itmiş ünsiyyətin bərpası idi: "Eyni zamanda tədrisdə boşluqlar yaranmışdı, bəzi mövzuların keçirilməsində problemlər var idi, "Yay məktəbi” onların qismən aradan qaldırılmasında rol oynadı”.

Təhsil ekspertinin sözlərinə görə, "Yay məktəbi" təşkil olunanda məqsəd o deyildi ki, bir il ərzində zəif keçirilən və ya keçirilməyən, şagirdlər tərəfindən zəif mənimsənilən və ya mənimsənilməyən mövzular tam olaraq onlara çatdırılsın: "Belə bir hədəf və məqsəd yox idi. Ən vacibi ondan ibarət idi ki, şagirdlərin asudə vaxtı səmərəli təşkil olunsun, onların bir-birilə ünsiyyət qabiliyyəti formalaşdırılsın. Məqsəd həm də, hər gün məktəbə getməklə əvvəlki illərdə formalaşmış praktika və təcrübənin yenidən təkrarlanması idi. Çünki pandemiya səbəbindən ənənəvi tədris tamamilə ləğv edilərək onlayna keçirildi, sonra hibrid formada həftədə 2-3 dəfə təşkil olundu. Şagirdlər əvvəl ənənəvi formada olduğu kimi, erkən saatlarda oyanıb məktəbə getmək vərdişlərini itirmişdilər. Ona görə "Yay məktəbi" əsasən şagirdlərin fiziki və psixoloji olaraq hər gün erkən saatlarda məktəbdə olma, tədris prosesində iştirak etmə bacarıqlarını formalaşdırmağa hədəflənmişdi".

Ekspert qeyd edib ki, ümumtəhsil məktəblərindəki şagirdlərin 35 faizi "Yay məktəbi"ndə iştirak edib:

"Azərbaycanın bütün bölgələrində monitorinqlər apardıq. "Yay məktəbi" Azərbaycanın bölgələrində çox keyfiyyətli təşkil edildi. Baxmayaraq ki, Aran zonasında havanın temperaturu yüksək idi, bu, şagirdlərin "Yay məktəbi"ndə iştirakına, müəllimlərin həvəslə dərs keçməsinə mane olmadı. Demək olar ki, bütün məktəblərdə "Yay məktəbi” açıq havada təşkil edildi. Bu, eyni zamanda yeni tədris alma formasını bizə öyrətdi ki, əgər hava şəraiti imkan verərsə, açıq havada da dərslər keçə bilərik. Hesab edirəm ki, bunun müsbət tərəfi var. Ən azından şagirdlərin azsaylı olması imkan verdi ki, onlar rahatlıqla mövzuları dinləyib, müəllimlərindən soruşsunlar”.

K. Əsədov Bakıda daha fərqli mühit gördüklərini deyib: "Digər tərəfdən, məktəb rəhbərliyinin şagirdlərlə şahmat oynaması, hətta özünün tədris prosesində iştirak etməsi, bölgələrdə rayon təhsil şöbələrinin birbaşa prosesləri nəzarətdə saxlaması "Yay məktəbi"ndə keyfiyyətə müsbət təsir göstərdi. Təbii ki, bütün hədəflərə çatılmadı. Buna səbəb bəzi müəllimlərin məsələyə kor-təbii yanaşmasıdır".

K. Əsədov bildirib ki, hava şəraiti ilə əlaqədar "Yay məktəbi"nin uzadılması mümkün deyil: "Həmçinin iyulun 1-dən etibarən müəllimlər məzuniyyətə çıxır. Onlar 56 günlük yay məzuniyyətində olacaqlar. Amma sentyabrın 15-dən deyil, tədrisi sentyabrın 1-dən başlasaq, qaldığımız yerdən daha da effektiv olar. Hesab edirəm ki, növbəti tədris ilini sentyabrın 1-dən başlamaqla digər yarımçıq qalmış hədəflərə də çata bilərik".

Qeyd edək ki, bu gün "Yay məktəbi"nin bağlanış mərasimi keçirilib. "Yay məktəbi”ndə ümumi təhsil müəssisələrinin I-X sinif şagirdləri ödənişsiz və könüllü əsaslarla iştirak ediblər. I-IV siniflərdə tədris həftədə 5 dəfə - gündəlik 3 saat olmaqla, V-X siniflərdə isə həftədə 5 dəfə - gündəlik 3-4 saat olmaqla təşkil olunub. I-IV siniflərdə məşğələlər tədris dili, riyaziyyat, xarici dil fənləri üzrə keçirilib. V-X siniflərdə məşğələlər tədris dili, riyaziyyat, xarici dil fənləri və ümumi təhsil müəssisəsinin rəhbərliyinin qərarı ilə digər 3 fənnə verilib.