FHN Avropa Azərbaycan məktəbində tədbir keçirib
Fövqəladə Hallar Nazirliyinin (FHN) Bakı Regional Mərkəzi nazirliyin regionda fəaliyyət göstərən digər qurumları ilə birgə Avropa Azərbaycan Məktəbində "Fövqəladə hallarla bağlı davranış qaydaları” mövzusunda maarifləndirmə tədbiri keçirib.
Aztehsil.com-un məlumatına görə, FHN-dən AZƏRTAC-a bildiriblər ki, tədbirin keçirilməsində məqsəd məktəbin şagird və müəllim kollektivinə təbii və texnogen mənşəli hadisələrin yaranma səbəbləri, onlardan qorunma yolları haqqında biliklərin aşılanması olub.
Tədbir nəzəri və praktik olmaqla iki hissədən ibarət təşkil edilib. Birinci hissədə "Zəlzələ zamanı necə davranmalı?”, "Sel və daşqın zamanı nə etməli?”, "Torpaq sürüşməsi zamanı davranış qaydaları”, "Məişətdə yanğın zamanı davranış qaydaları”, "Odsöndürən balonlardan istifadə”, "Dəm qazı”, "Civə dağılmaları zamanı davranış qaydaları” və "112” qaynar xətti” mövzularında məruzələr dinlənilib, mövzulara aid videoçarxlar nümayiş etdirilib.
Sonra məktəbin bir qrup şagirdinin iştirakı ilə fövqəladə hallarla bağlı səhnəcik nümayiş etdirilib.
FHN əməkdaşları şagirdlərin suallarını cavablandırıb və onlara təbliğat materialları, yaddaş kitabçaları, bukletlər paylayıblar.
Tədbirin praktiki hissəsində məktəbin idman zalında axtarış-xilasetmə üzrə nümunəvi təqdimatlar, fərdi mühafizə vasitələri, radiasiya, kimyəvi kəşfiyyat və dozimetrik nəzarət cihazları, onların təyinatı və iş prinsipləri, fövqəladə hallar zamanı ilkin tibbi yardım göstərilməsi haqqında məktəblilərə geniş məlumat verilib.
![]Fikrin təhrik edilməsi qaydaları:](/uploads/posts/2016-05/thumbs/1464592525_0c0128369debb480b37e508e9338c100.jpg)