Xəbərlər
04 noyabr 2016
4 438
Qax rayonu ümumtəhsil məktəblərində yerli səhiyyə orqanları ilə birgə maarifləndirmə tədbirləri davam edir
Zəyəm kənd tam orta məktəbində "Övladlarınız sizin gələcəyinizdir, gələcəyinizi sağlam düşünün” adlı talassemiyanın profilaktikasına həsr olunmuş tədbir keçirilib. Tədbirdə Tasmalı sahə xəstəxanasının baş həkimi Sayalı Rəsulova iştirak edib.
Azərbaycan Respublikası Prezidentinin 2015-ci il 10 fevral tarixli 1044 nömrəli Sərəncamı ilə " Talassemiya ilə mübarizəyə dair 2015-2020-ci illər üçün Dövlət Proqramı” nın tələbləri baxımından əhalinin geniş maarifləndirilməsi məqsədilə təşkil olunmuş tədbirdə talassemiya nədir, xəstəliyin əlamətləri hansılardır, xəstəliyin əsas səbəbi və s. kimi suallar cavablandırılıb. Şagirdlərə bildirilib ki, talassemiya hemoqlobin istehsalı zamanı yaranan zülal çatışmazlığıdır. Bu zülal qırmızı qan hüceyrəsində olur, oksigeni ağciyərlərdən bütün bədən hissələrinə nəql edir və qana qırmızı rəng verir. Talassemiya xəstəliyinin əsas səbəbi qohum evlilikləridir. Xəstəliyin heç bir əlaməti olmasa da, xəstələrdə immunitet zəifliyi, qan azlığı müşahidə edilir. Yəni, bir balaca soyuq olan kimi rəngləri avazıyır, tez-tez xəstələnirlər. Talassemiya daşıyıcıları zahirən çox sağlam görünürlər və heç bir problemləri olmur. Ancaq talassemiya daşıyıcılarının evliliyi zamanı xəstə uşaqlar doğulur. Buna görə də insanlar ailə həyatı qurmamışdan öncə qan testləri etməli, sağlamlıqlarına əmin olduqda ailə həyatı qurmalıdırlar. Talassemiya xəstəliyi isə davamlı müalicə tələb edən bir xəstəlikdir.
Tədbir bu fikirlərlə sona çatdırlıb: "Dünyaya xəstə övlad gətirmək istəmirsinizsə, ailə həyatı qurmamışdan öncə mütləq həkim müayinəsindən keçin. Nə qədər sevsəniz də, talassemiya daşıyıcısınızsa, övladlarınızın gələcəyini düşünüb daşıyıcı ilə ailə həyatı qurmayın. Siz daşıyıcı olduğunuz halda sağlam biri ilə ailə həyatı qursanız, övladlarınızda heç bir problem olmayacaq. Ancaq daşıyıcı ilə ailə həyatı xəstə övladın dünyaya gəlməsi deməkdir. Çalışın ailə quranda sağlamlıq haqqında arayış alın və mütləq müayinələrdən keçin. Övladlarınız sizin gələcəyinizdir, gələcəyinizi sağlam düşünün".
Günay Məmmədova . Qax.
