Hekayələr
04 iyul 2016
11 741
![](/templates/everydayyeni/images/aygunbaner.png)
Dəlidən doğru və gözəl məsləhət... Təsirli hekayə...
Böyük alim Bəyazid Bistami həzrətləri bir gün dəlixananın yanından keçirdi. Dəlixana xidmətçisinin bir qabda nəyisə döydüyünü görüb, soruşdu:
- Nə edirsən?.
Xidmətçi:
- Bura dəlixanadır, dəlilərə dərman hazırlayıram, - deyə cavab verdi.
Bistami soruşdu:
- Mənim də xəstəliyimə bir dərman tapa bilərsənmi?.
Xidmətçi tərəddüd etmədən düdi:
- "Taparam”.
Ancaq xəstəliyinin nə olduğunu hələ soruşmamışdı. Xidmətçi soruşdu:
- "Xəstəliyin nədir?”.
Bistami dedi:
- Mənim xəstəliyimin adı günahdır. Çox günah işləyirəm. Əgər bilirsənsə, mənə bir dərman de,.
Xidmətçinin dili dolaşdı və cavab verdi:
- Mənim günah xəstəliyindən başım çıxmır. Mən ancaq dəlilərə dərman hazırlayıram.
Elə bu vaxt dəlixananın dəmir barmaqlıqları arasından onlara qulaq asan bir dəli Bistamiyə dedi:
- Mən sənin xəstəliyinin dərmanını bilirəm.
Bistami dedi:
- De görüm, dərdimin dərmanı nədir?
Dəli dedi:
- Tövbə kökü ilə peşmanlıq yarpağını qarışdır. Qəlb həvəngində iman həvəngdəstəsi ilə döy, insaf ələyindən keçirib göz yaşı ilə yoğur, sonra da eşq təndirində bişirib, hər səhər-axşam bol-bol ye. Onda sənin xəstəliyindən əsər-əlamət qalmaz...
Bu gözəl dərmanı öyrənən Bistami:
- Ey gidi dünya! Demək, sənə də dəli deyənlər var, - dedi və oradan uzaqlaşdı. Ondan sonra Bəyazid Bistami günah xəstəliyinə tutulanlara həmişə bu "dərmanı” tövsiyə edirdi...
Əsma Nur