Siyasi ekspertdən qınaq..."Niyə 14 ildə Qarabağ Dövlət Universiteti yaradılmayıb?"

Şuşada ermənilərin yaratdığı "Şuşa texnoloji universitet”inin tələbələri avqustun 6-dan təcrübə keçmək üçün Livana yollanması barədə Moderator.az-da gedən xəbər (moderator.az/news/236788.html) daha bir mövzunu aktuallaşdırıb.

Belə ki, ölkə rəhbəri İlham Əliyev 2004-cü ilin fevralında prezident kimi ilk səfərini Bərdə rayonuna edəndə millət vəkili Zahid Orucun təklifi və xahişi əsasında rayonda Qarabağ Dövlət Universiteti yaradılması barədə elə ordaca müvafiq qurumlara tapşırıq verib.

Aradan 15 il keçir. Ermənilər Şuşada ikinci universitet açmağa hazırlaşır. Bizsə hələ də "Lazım"ın gəlməsini gözləyirik.

Qarabağ Dövlət Universitetinin açılmasının vacib addım olduğunu bildirən millət vəkili Fazil Mustafa Moderator.az -a açıqlamasında deyib ki, açılacaq universitet öncədən ən səviyyəli təhsil ocağı kimi düşünülməsə, burada Qarabağ adını istifadə edib hörmətdən salmağa da dəyməz. (Həmin yazı bu linkdə--- moderator.az/news/236881.html)

Qarabağı almağın müşkül olduğunu hamı qəbul edir, bəs Qarabağ Dövlət Universitetini yaratmaq da bu qədər müşküldürmü? Olmazmı belə bir ali təhsil ocağı yaradılaraq yüksək məvaciblə xaricdən nüfuzlu alimlər dəvət edilib bu yolla Qarabağ adını daha bir platformada dünya elmi ictimaiyyətininn beyninə yeridək?

Aztehsil.com xəbər verir ki, tanınmış politoloq Cümşüd Nuriyev Moderator.az əməkdaşının bu sualına aşağıdakı cavabı verib:

"İdeya çox gözəldir, lakin anlaşılmayan odur ki, bu 14 il müddətində Təhsil Nazirliyi Cənab Prezidentin tapşırığını niyə icra etməyib? Təəssüf ki, ölkəmizdə təhsilin vəziyyəti çox acınacaqlıdır. İldən-ilə təhsilin səviyyəsi aşağı düşür. Bölgələrdə universitetlərin açılması çox vacibdir, həm şəhərin siyasi və ictimai yükü azalar, həm də urbanizasiya problemi tədricən həllini tapar. Xaricdən müəllim dəvət etməyə ehtiyac yoxdur, çünki bizdə kifayət qədər peşəkar pedaqoqlar var. Lakin həmin savadlı müəllimlər təhsil alverçiləri tərəfindən sıradışı ediliblər. Təhsili korrupsiyadan qurtarmaq üşün alverçiləri oradan uzaqlaşdırmaq lazımdır. Təhsil təkcə korrupsiyalaşmayıb. həm də mafiyalaşıb. Bəzi rektorların dəllal qrupu bütün təhsili biznesə çevirib və bu biznesdə nazirliyin iştirak payı da az deyil.

Əgər Qarabağ Dövlət Universiteti də əvvəlkilər kimi olcaqsa heç açılmasın. Biz bir millət kimi bütün dəyərlərimizə biganə yanaşmağa başlamışıq. Əgər belə davam etsə, biz milli faciə ilə üz-üzə qalmaq məcburiyyətində olacağıq".