Xəbərlər / Cəmiyyət
07 avqust 2017
2 880
“Qarabağ universitetinin yaranmasına Elçibəyin müşaviri mane oldu”
Bir neçə il öncə deputat Zahid Oruc Bərdədə Qarabağ Dövlət Universitetinin yaradılması təşəbbüsünü irəli sürmüşdü. Deputatın təklifindən 2 il sonra ölkə başçısı İlham Əliyev Bərdədə səfərdə olarkən həmin rayonda Qarabağ Dövlət Universitetinin yaradılması təşəbbüsünə çox böyük ilgi göstərmişdi, dərhal bununla bağlı müvafiq strukturlara tapşırıq da vermişdi. Ancaq həmin ideya nədənsə unudulmuşdu. Bu günlərdə təhsil eksperti Kamran Əsədov Qarabağ Dövlət Universiteti yaradılmasını ideyasını yenidən gündəmə gətirib. Ekspert lazımi dəstək olacağı təqdirdə Qarabağ Dövlət Universiteti adında təhsil müəssisəsi açmağın, onu bütün dünyada tanıtmağın mümkünlüyünü vurğulayıb. Firudin Cəlilov bildirib ki, Qarabağ Universitetinin yaranması onun hələ 1992-ci ildə arzusu olub:"Qarabağ Universitetinin yaradılması fikri çox müsbətdir. Mən 1992-ci ildə bu məsələni qaldırmışdım və az qalmışdı ki, gerçəkləşdirim. O vaxt hələ müharibə də çox qızışmamışdı. Xankəndində bir universitet filialı, Şuşada da pedaqoji texnikum var idi və onları birləşdirib Qarabağ Universiteti açmaq istəyirdim. Sənədlər də hazır idi və Qarabağlı ziyalılar da bu işdə mənə kömək edirdilər. Hər şey hazır oldu, ancaq sonra müharibə qızışdı deyə məsələ bir qədər ləngidi. Buna baxmayaraq fikrimizdən yayınmadıq, Xankəndində olmasa da bizdə olan torpaqlarda bu ideyanı reallaşdırmaq istədik. Amma rəhmətlik Elçibəyin o vaxt humanitar məsələlər üzrə müşaviri bu ideyanı gerçəkləşdirməyimizə mane oldu. Mən o zaman təkcə Qarabağ Universiteti yox, həm də Qazax Universiteti açmaq istəyirdim. Bunu ona görə düşünmüşdüm ki, Gürcüstanda yaşayan soydaşlarımız da gəlib orada oxuya bilsin. O ideya da yarımçılıq qaldı. İndi Qarabağ Dövlət Universitetinin yaradılması fikrini ancaq alqışlaya bilərəm”.Hörmətli professorumuz ad açıqlamasa da, qeyd edək ki, o zaman Əbülfəz Elçibəyin humanitar məsələlər üzrə müşaviri Rafiq İsmayılov olub.
