Xəbərlər / Cəmiyyət
07 sentyabr 2017
4 326
HƏM ÖDƏNİŞSİZ, HƏM DƏ AZ BAL...
Neft erası başa çatdı, perspektivli deyil
Ona görə abituriyentlər kənd təsərrüfatı ixtisaslarına meyl edirlər
Bu il ali məktəbə sənəd verənlər arasında kənd təsərrüfatı ixtisaslarına maraq göstərənlərin sayı artıb. 2017/2018-ci tədris ilində universitetə daxil olan ən yaşlı abituriyent 48, ən azyaşlısı isə 15 yaşındadı.
Qeyd edək ki, Quba rayon sakini 48 yaşlı Əfsəl Qazıyev və Tovuz rayon sakini 15 yaşlı Elcan İsayev Azərbaycan Dövlət Aqrar Universitetinə (ADAU) qəbul olublar. E.İsayev "meşəçilik”, Ə.Qazıyev isə "ekologiya” ixtisasını seçib.
Maraqlıdır, abituriyentlərin kənd təsərrüfatına üstünlük vermələrinin əsas səbəbi nədir? Keçid ballarının aşağı olması, yoxsa kənd təsərrüfatı sahəsində təhsil alanların azlığı abituriyentləri bu ixtisası seçməyə vadar edir?
Təhsil üzrə ekspert Kamran Əsədovun sözlərinə görə, imtahan verənlərin kənd təsərrüfatı ixtisasını seçməsinin əsas səbəblərindən biri keçid ballarının digər fakültələrlə müqayisədə aşağı olmasıdır. Ekspert bildirib ki, abituriyentlərin həmçinin bu sahə üzrə pulsuz təhsil almaq şansları da çoxdur:
"Azərbaycanda ali təhsil müəssisələrinə qəbul olmaq üçün sənəd verənlərin sayında azalma olmasına baxmayaraq, nəticədə imtahanda iştirak edənlərin topladığı ballar əvvəlki illərlə müqayisədə çox olub. Yəni, bu il ali məktəblərə qəbul olmaq üçün sənəd verən 70 mindən çox abituriyentin 35 mini keçid balını toplayıb. Əvvəlki illərlə müqayisədə yüksək bal toplayanların da sayında artım müşahidə olunub. Belə ki, 2 mindən çox abituriyent 600-dən yuxarı bal toplayıb. Bu da müsabiqə vəziyyətinin daha da gərginləşməsi ilə nəticələndi, bəzi qruplarda ixtisaslar üzrə keçid balları qalxdı. Hətta bu il ilk dəfə olaraq 660-dan çox bal toplayanların belə ali məktəblərin ödənişsiz ixtisaslarına qəbulunda məhdudiyyətlər oldu.
Artıq son illər ərzində ali məktəbə sənəd verənlər arasında kənd təsərrüfatı ixtisaslarına üstünlük verənlərin sayı artıb. Burada müəyyən detallar var. Əgər digər ixtisaslara 200-250 balla qəbul olmaq mümkündürsə, 150 bal toplamaqla kənd təsərrüfatı üzrə pulsuz təhsil almaq mümkündür. Bu da o deməkdir ki, digər qruplarla müqayisədə kənd təsərrüfatı ixtisasına qəbul olmaq üçün abituriyentlərin şansları daha çoxdur”.
K.Əsədovun sözlərinə görə, 2014-cü ilə qədər abituriyentlərin seçdiyi ixtisaslar içərisində neft ixtisasları üstünlük təşkil edirdi. Artıq neft erası başa çatıb və perspektivli deyil. Həmçinin ölkə rəhbərliyi səviyyəsində də kənd təsərrüfatının inkişafı ilə bağlı xüsusi layihələr, proqramlar həyata keçirilir:
"Ölkə başçısı özü regionlarda məhz kənd təsərrüfatı sahələri ilə məşğul olanlarla görüşür. Bu o deməkdir ki, ölkənin prioritet istiqamətləri bundan sonra kənd təsərrüfatı ixtisasları olacaq. Ona görə də hesab edirəm ki, həm yaşlı, həm də gənc abituriyentin bu sahəyə meyil etməsinin əsas səbəbi gələcəkdə kənd təsərrüfatı ixtisasının yüksək perspektividir. Çünki digər ixtisasları bitirən zaman sizin işlə təmin olunmanızda ciddi problemlər ortaya çıxa bilirsə və əmək bazarında sizin ixtisasınıza tələbat yoxdursa, kənd təsərrüfatını bitirən kadrlara hər zaman ehtiyac var. Kənd təsərrüfatı hər bir ölkənin ən perspektiv, iqtisadi sahələrindən biridir.
Düşünürəm ki, növbəti illərdə daha çox yüksək bal toplayan abituriyentlərin bu sahəni seçmələrinin şahidi olacağıq. Əgər 350 balla perspektivli olmayan ixtisaslarda təhsil alanlar ödənişli əsaslarla oxuyacaqlarsa, həmin balla kənd təsərrüfatı ixtisaslarında ödənişsiz təhsil almaq olar. Fikrimcə, kənd təsərrüfatının həm perspektiv, həm ödənişsiz olması, abituriyentlərin bu sahəyə daha çox meyl etməsinə səbəb olan əsas amillərdən biridir”.
