Xəbərlər / Cəmiyyət
22 avqust 2017
3 850
SABİQ DEPUTATIN ƏLAÇI OĞLUNA NİYƏ QIZIL MEDAL VERİLMƏDİ? – AÇIQLAMA
Sabiq millət vəkili Nazim Bəydəmirlinin oğlu qırmızı attestat alsa da, qızıl medala layiq görülməyib. Bu barədə eks-deputat "Facebook" səhifəsində yazıb. O, oğlu Cavidə qarşı haqsızlıq edildiyini bildirib:
"Bəydəmirli Cavid bu attestatdan ötəri istirahətini yarımçıq qoyub Bakıya gedib. Qızıl medal verməyiblər, səbəbi bürokratiya və Nazirlər Kabinetinin qərarının düzgün tətbiq olunmamasıdır. İki Beynəlxalq bilik yarışması iştirakçısı (birində qalib, o birisində laureat) Qızıl medal ala bilməz, amma tərif dolu inşa yazanlar alar". Məsələ ilə bağlı təhsil eksperti Kamran Əsədovun fikirlərini öyrəndik. Ekspert bildirib ki, sabiq deputat iradında haqlıdır: "İlk növbədə qeyd edim ki, "Ümumi təhsili xüsusi nailiyyətlərlə başa vuran məzunların qızıl və ya gümüş medalla təltif olunma qaydası"nın təsdiq edilməsi haqqında Azərbaycan Respublikasının Nazirlər Kabinetinin qərarı var. 14 yanvar 2010-cu ildə Azərbaycan Respublikasının Baş naziri Artut Rasi-zadənin imzası ilə təstiq olunmuş sənəddə deyilir ki, ümumtəhsil məktəbində təhsil aldığı müddətdə təhsildə xüsusi nəticələri ilə bərabər nümunəvi davranışı ilə fərqlənən tam orta təhsil səviyyəsinin məzunlarının namizədliyi qızıl və ya gümüş medalla təltif olunmaq üçün təqdim edilir.
Respublika fənn olimpiadalarının yekun mərhələsində, rayon (şəhər), ölkə və beynəlxalq səviyyəli bilik yarışlarında, müsabiqə və layihələrdə mükafata layiq görülmə də təhsilalanın qızıl və ya gümüş medalla təltifi üçün namizədliyinin verilməsi zamanı nəzərə alınır. Yəni, bu kateqoriyalardan hər hansı biri namizədliyi irəli sürülən şəxsdə varsa, o fərqlənmə attestatı ilə yanaşı qızıl və ya gümüş medal ala bilər.
Həmin qaydaların müvafiq maddələrini qeyd edim:
4. Aşağıdakı təhsilalanların qızıl və ya gümüş medalla təltifi üçün namizədliyi verilə bilər:
4.1. ümumi orta təhsil səviyyəsini 75 faiz "əla" qiymətlərlə bitirənlər;
4.2. tam orta təhsil səviyyəsində oxuduğu müddətdə fənlər üzrə cari qiymətlərinin ən azı 75 faizi "əla" olanlar;
4.3. bütün fənlərdən illik qiymətləri "əla" olanlar; 4.4. bu Qaydanın 2-ci bəndində nəzərdə tutulan tələblərə uyğun olanlar.
Bunlara nəzər saldıqda görürük ki, hörmətli iqtisadçı, keçmiş deputat Nazim Bəydəmirlinin övladı, DİM-in imtahanlarında yüksək bal toplamış, lakin bununla kifayətlənməyərək SAT imtahanı verərək ordan da yükskək nəticə əldə edərək ADA-ya qəbul olan Cavid Bəydəmirliyə qızıl medal verilməli idi. Bunlarla hanaşı o həmdə Ukrayna və digər ölkələrdə beynəlxalq elmi yarışların, olimpiyadaya bərabər tutulan layihələrin iştirakçısı və qalibi olub".
Mövzu ilə əlaqədar Təhsil Nazirliyi ilə əlaqə saxladıq. Nazirlikdən bildirdilər ki, seçimlər qüvvədə olan qərara əsasən aparılıb. Seçimlərin qeyri-obyektiv aparılmasından söhbət belə gedə bilməz.
PrimeTime.Az
