Müəlliməni döyərək soyğunçuluq edən şəxsin məhkəməsi başlayıb

Bu gün Bakı Ağır Cinayətlər Məhkəməsində orta məktəb müəlliminə qarşı quldurluq etməkdə təqsirləndirilən Əziz Səmədovun cinayət işi üzrə məhkəmə prosesi başlayıb.

Aztehsil.com apa-ya istinadən xəbər verir ki , hakim İradə Həsənzadənin sədrliyi ilə keçirilən prosesdə prokuror Fariz Rzayev ittiham aktını elan edib.

İttihama görə, ötən il sentyabrın 26-da Yasamal rayonunda 173 saylı orta məktəbin qarşısında naməlum şəxs həmin məktəbin müəllimi, Bakı şəhər sakini, 1952-ci il təvəllüdlü Nazilə Quliyevaya hücum edərək onun əlindəki çantanı almaq istəyib. Amma Nazilə Quliyeva çantasını ona verməyib.

Bu zaman həmin şəxs Nazilə Quliyevanı yerə yıxaraq əlindəki çantanı alaraq qaçıb. Çantada Nazilə Quliyevaya məxsus telefon, pul və plastik bank kartı olub.

Nazilə Quliyeva həmin vaxt aldığı xəsarətdən xəstəxanaya yerləşdirilib. Onun hər iki çanaq sümüyünün sındığı məlum olub.

"Təhlükəsizlik Şəhər” kamerasına baxış keçirən polislər cinayəti törədən şəxsi müəyyən ediblər.

Müəyyən edilib ki, Nazilə Quliyevaya qarşı quldurluq edən Əziz Səmədovdur.

Ə. Səmədov Cinayət Məcəlləsinin 181-ci (quldurluq) maddəsi ilə ittiham edilir.

İttihama münasibət bildirən Əziz Səmədov özünü qismən təqsirli bilib, bildirib ki, quldurluq cinayəti törətməyib: "Mən özümü soyğunçuluqda təqsirli bilirəm. Çünki quldurluq etməmişəm, qadını yerə yıxmamışam və yerdə sürüməmişəm. Mən qadının əlindən çantanı alanda özünü yerə atdı”.

Əziz Səmədov ifadəsinin törətdiyi əməldən peşman olduğunu bildirib.

Daha sonra şahid qismində N. Quliyevanın oğlu Anar Quliyev ifadə verib. Onun sözlərinə görə, məlum hadisələrdən sonra anası yeriyə bilmir.

Proses iyunun 12-də davam edəcək.

Məqalə Göndər