Xəbərlər
30 may 2017
2 968
Məleykə Abbaszadə Litvalı qonaqla görüşüb
2017-ci il 25 may tarixində DİM Direktorlar Şurasının sədri Məleykə Abbaszadə Litva Dövlət Katibinin müavini, "Azərbaycan dövlət qulluğu sistemində islahatların davam etdirilməsinə dəstək” adlı Tvinninq layihəsinin Litva Respublikası tərəfindən layihə rəhbəri Alminas Maciulis ilə görüşmüşdür.
Görüşdə DİM Direktorlar Şurasının sədr müavini Bəhram Xəlilov, DİM Strateji İnkişaf şöbəsinin müdiri-Azərbaycan Respublikası tərəfindən layihə rəhbəri Fuad Mayılov, Litva Dövlət Qulluğu Departamentinin direktor müavini-Rezident Tvinninq müşaviri Edvardas Zukauskas da iştirak etmişdir.
Görüş zamanı layihənin ümumi gedişatı, layihə çərçivəsində həll edilmiş məsələlər, həyata keçirilmiş tədbirlər, əldə edilmiş nəticələr barədə ümumi fikir mübadiləsi aparılmışdır.
Layihə rəhbərləri hesabat dövründə layihənin maneəsiz və uğurla icra olunduğunu vurğulayaraq həyata keçirilən fəaliyyətlərin layihənin ümumi məqsədlərinə öz töhfəsini verdiyini və gələcək inkişaf üçün zəmin yaratdığını qeyd etmişlər.
Tvinninq layihəsinin icra vəziyyətinə dair fikirlərini bildirən tərəflər Layihə üzrə keçirilən tədbirləri, bu istiqamətdə görülən işləri qənaətbəxş qiymətləndirmişdir.
Sonda ikitərəfli əməkdaşlığın növbəti mərhələləri müzakirə edilmiş, Tvinninq kontraktının müddəalarına uyğun olaraq növbəti tədbirlərə dair fikir mübadiləsi aparılmış və Layihənin səmərəli tətbiqinə dair təklif və tövsiyələr verilmişdir.
Qeyd edək ki, "Azərbaycan dövlət qulluğu sistemində islahatların davam etdirilməsinə dəstək” adlı Tvinninq layihəsi Avropa İttifaqı tərəfindən maliyyələşdirilir və iki il müddətində həyata keçiriləcəkdir. Layihənin əsas məqsədi Azərbaycanda Avropanın qabaqcıl təcrübəsinə uyğun peşəkar və dayanıqlı dövlət qulluğu sisteminin daha da inkişaf etdirilməsinə töhfə vermək, dövlət qulluğu vəzifələrinin yeni təsnifat sisteminin yaradılması və bu sistemin dövlət qulluğuna qəbul, dövlət qulluqçularının xidməti fəaliyyətinin qiymətləndirilməsi və əməyin ödənilməsi sistemi ilə əlaqələndirilməsidir. Layihə dövlət idarəetmə mexanizminin təkmilləşdirilməsi, təcrübə mübadiləsi, eləcə də milli qanunvericiliyin Avropa İttifaqı standartlarına uyğunlaşdırılmasını nəzərdə tutur.
aztehsil.com
