Xəbərlər
17 may 2017
3 321
BDU-nun kafedra müdiri vəfat etdi
Bakı Dövlət Universitetinin (BDU) kafedra müdiri vəfat edib.
Aztehsil.com Report-a istinadən verdiyi məlumata görə, geologiya-mineralogiya elmləri namizədi, BDU-nun "Paleontologiya və tarixi geologiya” kafedrasının müdiri, dosent Həmid Hüseynov dünyasını dəyişib.
Qeyd edək ki, H.Hüseynov 1946-cı ilin sentyabrın 11-də Bakı şəhərində anadan olub. Azərbaycan Dövlət Universitetinin (indiki BDU) geologiya-coğrafiya fakültəsini bitirib, mühəndis-geoloq ixtisasını alıb.
1968-1971-ci illərdə "Paleontologiya və tarixi geologiya” kafedrasının aspirantı olub, sonrakı illərdə müəllim, baş müəllim və dosent vəzifələrini tutub. 1975-1979-cu illərdə Fransa və Əlcəzair respublikalarında pedaqoq kimi çalışıb, Milli Neft və Qaz İnstitutunda (Əlcəzair, Bumerdes şəhəri) "Paleontologiya” və "Tarixi geologiya” fənlərindən mühazirələr oxuyub, milli geoloq kadrlar hazırlayıb.
1990-1992-ci illərdə BDU-nun prorektoru vəzifəsində işləyib.
2012-ci ildən "Ümumi və tarixi geologiya” kafedrasının müdiri olub.
1 monoqrafiya, 1 dərs vəsaiti, 1 dərslik, 5 metodik göstəriş, 100-ə yaxın məqalə və tezislərin müəllifidir.
