MİQ sualları niyə kənara sızdı?-İlham Əhmədov
Proseslərdən belə görünür ki, MİQ imtahanlarının suallarını hazırlıq kurslarının repetitorları hazırlayır. Bizim reallıqda imtahan suallarının kənara sızması təbii haldır. Çünki, kurs rəhbərləri bu halda əlavə üstünlük qazanaraq rəqabətdə irəli çıxa bilərlər. İmtahan suallarının sızması ola bilsin ki, hətta əvvəlki illərdə, digər fənlərdə də olmuşdur.
Bu vəziyyət həm də məsuliyyətsiz kurs əməkdaşlarının prosesə cəlb edilməsi ilə əlaqədardır.
MİQ-də yüksək nəticələrlə universitetlər öyünməkdənsə indi kurslar öyünür. Guya ki, müəllimlər 4 illik universitet təhsili hesabına yox, 2 aylıq kurs hesabına yetişirlər. Bu vəziyyət MİQ imtahanları sualların məzmunun pedaqoji təhsilə yaxınlaşmasını, pedaqoji təhsilin məzmununun da MİQ suallarına yaxınlaşmasını zəruri edir. Bu halda problemlər xeyli azalar.
İndi məktəb proqramı ilə DİM qəbul proqramı arasında, universitetlərin dövlət imtahanı proqramı ilə MİQ proqramı arasında olan ciddi fərqlər təhsilin yox, repetitorluğun inkişafına xidmət edir. TN bunun fərqində deyilmi?
Əvvəllər TN Universitetlərlə əməkdaşlıq edərdi. İndi isə kurslarla əməkdaşlıq edir. TN-dəki son illərin kadr təyinatına diqqət yetirsəniz bunu aydın görərsiniz.
Bütün bu dolaşıqlıqları yaratmaqda məqsəd nədir? Kim qazanır bundan. Hər halda şagird, məzun və valideynlər bundan heç nə qazanmır.
